Мақтаарал аудандық шекара басқармасының келісімімен Өзбекстан Республикасымен шектесетін шекараның бейтарап аумағындағы «Шығыс» коллекторының екі жағында орнатылған темір торлары алынып, су өткізгіш қабілетті арттырылды. Атакент кентінің егістік алқаптардың аяқ жағынан өнімділігі сағатына 100 текше метр су сорғы насостар орнатылып, К-18 каналына тасталды. Сондай-ақ бұл күні қатты жауын-шашын салдарынан Атакент кенті, Мақтаарал, Ж.Нұрлыбаев, Достық, Жаңажол, Жамбыл ауылдық округтері аумағында жер асты суы деңгейі көтеріліп, бірнеше үйлердің ауласына су толғандығы жөнінде аудандық өрт сөндіру бекеттерінің байланыс бөліміне тұрғындардан хабарлама түскен. Ол бойынша жергілікті атқарушы және төтенше жағдай бөлімінің қызметкерлері тарапынан аумақтан су сорып шығару жұмыстары жүргізілді. Аудан әкімдігінің хабарлауынша, 60-қа жуық су сорғыштар көшелер мен үйдің аулаларына толған суды шығару жұмыстарымен айналысты.
Жалпы, Түркістан облысында су тасқынына қарсы қауіпсіздік жұмыстары жоспарға сай жүргізілуде. Төтенше жағдайлар департаменті бастығының орынбасары Е.Сарыбаевтың айтуынша, қазіргі таңда облыс аумағында су тасқыны бойынша жағдай бір қалыпты, тұрақты бақылауда. Су тасқынының алдын алу мақсатында Түркістан облысында 1 200 шақырымнан астам 680 арық, канал қоқыстан тазартылды, 61 500 дана қап, 482 тонна инертті материал әзірленген. Жергілікті атқарушы органдар мен төтенше жағдайлар департаменті тарапынан жалпы 2 065 адам, 400 бірлік техника, 6 қайық, 294 мотопомпа дайындыққа келтірілген. Су қоймалары мен өзендердің су режіміне күнделікті мониторинг жүргізілуде. Облыс бойынша су қоймаларының орташа толуы 45-50%-ды құрайды. Яғни тасқын суларды қабылдауға жеткілікті орын бар.
Түркістан облысы
