Өнер • 16 Наурыз, 2022

«Айналайын, халқымнан еркелеткен»

683 рет
көрсетілді
3 мин
оқу үшін

Бас шаһардың Бейбітшілік және келісім сарайында отандық эстрада әншілерінің қатысуымен КСРО және Қазақстанның Халық әртісі, Халық Қаһарманы Роза Бағланованың 100 жылдық мерейтойына арналған «Айналайын, халқымнан еркелеткен» атты салтанатты концерт өтті. Тағылымды кешке Алтынбек Қоразбаев, Сұлушаш Нұрмағамбетова бастаған қазақ өнерінің қайраткерлері мен талантты жас өнерпаздар қатысып, әйгілі әншінің рухына тағзым етті.

«Айналайын, халқымнан еркелеткен»

– Роза Бағланова – аңыз адам, қа­зақ эстрадасының жарық жұлдызы, тұғыры биік тұлға. Ол кісінің ән әле­­мін­дегі жү­ріп­ өткен өнегелі жолы ізінен еріп келе жатқан жас өнерпаздар үшін ғұмырлық тағылым. Бүгінде «Қазақконцерт»  ұйымы ұлы әншінің есімімен аталады. Бұл – қазақ әнінің аңызына көрсетілген зор құрмет. Қазақ әні мен талғампаз тыңдарманы барда Роза Бағланованың есімі өшпек емес, халық жадында мәңгі жасайды, деді Қазақстанның халық әртісі, композитор Алтынбек Қоразбаев.

Қазақ өнерінде қайталанбас із қалдырған тарихи тұлғаның мерейтойына арналған кеште аңыз әншінің репертуарындағы әндер жанды да­уыста шырқалды. Есімі елге белгілі өнерпаздармен бірге айтулы концертте Роза Бағланованың немересі Үрбибі Бағланова да өнер көрсетті.

Үрбибі – Роза Бағланованың азан шақырып қойған есімі. Ұлы тұлғаның есімін иеленген талантты қыз әжесінің  жолын қуып, өнердегі өзінің қайталанбас жолын қалыптастыруды мақсат етіпті.

Роза Тәжібайқызы  – Халық Қаһарманы атағына ие болған Қазақстандағы жалғыз әнші. Ол өмірінің 70 жылынан астамын сахнада өткізіп, әлемнің 50-ден аса елінде болып 25 тілде ән шыр­қа­ған. Сөйтіп, жарты ғасырдан астам уақыт бойы қазақ халқының дәс­түрлі мәдениеті мен өнерінің өр­кен­деп, әлемге танылуына зор үлес қосты.

Алып сарайды толтырған тал­ғам­паз тыңдарманның көңіл-күйінен ұлы тұлғаға деген шексіз құрмет лебі еседі. Күміс көмей әншінің тамаша әндері халықтың әншіге деген сағынышын үдете түскендей. Бейбітшілік және келісім сарайына жиналған өнерсүйер қауым әсем әннен қуат алып, рухани демалып қайтты.

Әнші мерейтойына арналған іс-шаралар алдағы уақытта да жүйелі жал­ға­сын табады. Атап айтсақ, Мә­де­ниет және спорт министрлігінің ұйым­­дастыруымен Қызылорда, Ал­маты, Мәскеу қалаларында ән­ші­нің шығармашылығына ар­нал­ған мерейтойлық концерттер және Нұр-Сұлтан қаласында Халық қа­һар­маны Роза Бағланова атын­да­ғы Халықаралық вокалдық конкурс ұйымдастырылады деп жоспарлануда. Сонымен қатар  Роза Бағла­но­ва­ның 100 жылдығы ЮНЕСКО-ның Париж қаласындағы штаб пәтерінде аталып өтеді.

Роза Бағланованың әні барда ол ешқашан өлмейді. Бұлбұл әншінің бірегей шығармашылығы, ғибратты ғұмыры, қайраткерлік қасиеттері өскелең ұрпақтың жадында мәңгіге сақталады.