Облыстық ТЖД, Төтенше жағдайдың алдын алу басқармасының бастығы Алексей Штыкел, «Қазгидромет» РМК филиалының директоры Адель Ахметовтің қатысуымен өткен баспасөз конференциясында су тасқыны қаупі бар кезеңге дайындықтың қалай жүріп жатқандығы туралы айтылды.
– Су тасқынының біздің облыста орын алуы – жылдағы құбылыс. Таулы, нулы, сулы өңір болғандықтан, бұл қалыпты жағдай. Тек біз оған дайын болуымыз керек. Нақтырақ айтсақ, облыс аумағынан 800-ге жуық өзен ағып өтеді. Олардың жалпы ұзындығы 10 мың шақырымнан асады. Көп жылдық синоптикалық болжам бойынша, облыс өзендеріндегі су тасқыны наурыздың екінші онкүндігінде басталып, маусымның екінші онкүндігінің ортасына дейін созылады, – дейді облыстық ТЖД алдын алу басқармасының бастығы Алексей Штыкел.
Бүгінде облыс аумағында жауапты мамандар дайындық кестесі бойынша жұмыс істеп жатыр. Әкімдіктерде тәулік бойы кезекшілік ұйымдастырылды, су тасқыны қаупі бар жерлерге мониторинг жүргізілді. Іс-қимылдардың барлығы дерлік егжей-тегжейлі жоспарланып, су тасқынына қарсы іс-шаралар облыста жүйелі түрде жүргізіліп жатыр. Ақпан айының бірінші жұлдызынан бастап өңірде су тасқыны болу қаупі бар аймақтарда жоғары санаттағы арнайы мамандар кезекшілік жүргізіп, сараптама жасады. Облыс әкімі аппаратының жұмылдыру дайындығы бөлімінің басшысы Еркен Сәрсембиновтің айтуынша, кезек күттірмейтін шығындар мен төтенше жағдайларды жою үшін бюджеттен барлығы 2,6 млрд теңге қаражат қарастырылған. Оның 1,2 млрд теңгесі облыстық резервте.
Тұрғылықты аймақтардан жалпы көлемі 304 мың текше метр қар шығарылды, автомобиль және теміржолдардағы су өткізу құрылыстары, көпірлер, арықтар мен каналдар тазартылды. 104 мың дана қап, 6,7 мың тонна инертті материалдар, 690 тонна жанар-жағармай дайындалды.
Айта кетсек, облыс бойынша 108 елді мекенді су басу қаупі бар. Су тасқынын болдырмау үшін 3 наурыздан бастап облыстың Бұқтырма, Ертіс, Күршім, Үбі өзендері кесіп өтетін 7 ауданда мұз жару профилактикалық жарылыс жұмыстары басталды. Су басуын болдырмау үшін жағалауды бекіту және түбін тереңдету, бөгеттерді жөндеу, арнаны реттеу сынды жұмыстар қолға алынып, алдын алу шаралары жүргізіліп-ақ жатыр.
Ал 3-5 наурыз аралығында Бородулиха, Шемонаиха аудандарында және Семей қаласында жалпы ауданы 29 896 шаршы метрді құрайтын өзен мұзын жару жұмыстары жүргізілді.
– 10 наурыздағы жағдаймен алып қарасақ, Шығыс Қазақстан облысының өзендеріндегі гидрологиялық жағдай тұрақты. Қысқы су деңгейінің төмендігі байқалады. Шағын өзендердің кейбірінде мұз еріп жатыр, – дейді «Қазгидромет» РМК филиалының директоры Адель Ахметов.
Егер табиғаттың тосын мінезі байқалып, жағдай күрт өзгерсе, облыс және аудан әкімдіктерін, облыстық ТЖД және мүдделі органдар дереу хабардар етілмек. Жалпы, Шығыс Қазақстанда 2021-2023 жылдарға арналған су тасқынына қарсы іс-шаралардың жол картасы шеңберінде 162 млн теңгеге 11 іс-шара жүзеге асырылған.
Шығыс Қазақстан облысы
