Ғылым • 24 Наурыз, 2022

Ғылыми жобалар сарапқа салынды

73 рет көрсетілді

Түркістан қаласындағы Назарбаев зияткерлік мектебінде дәстүрлі ғылыми жобалар байқауы өтті. Оған еліміздің әр өңіріндегі Назарбаев зияткерлік мектебінің шәкірттері қатысты. Жасанды интеллект және мехатроника тақырыбына арналған са­йыста оқушылар медицина, экология, математика, химия, биология, физика бағытындағы жобаларын ұсынды.

Бұған дейін НЗМ оқушыларына жасанды интеллект, цифр­лы технологиялар, роботтехника, инженерия, сәулет өнері, экология саласындағы танымал отандық және шетелдік спикерлер онлайн-форматта қазақ, ағылшын және орыс тілдерінде вебинарлар өткізген. Олардың қатарында еуропалық футурист Герд Леонхард (Швейцария), сутекті көлік түрлері бойынша аустралиялық сарапшы Брендан Норман, ресейлік «R:ED» ком­паниясының білім беру жобаларын дамыту бөлімінің басшысы Алиса Большакова, Назарбаев университетінің ғылыми қызмет­кері Жанат Махатаева және бас­қа да беделді ғалымдар бар. Ал практикалық сабақтар топо­г­ра­фиядағы Пифагор теоремасына, жер сілкіністерін түсіну үшін математикалық модельдеуді пай­далануға, ғарыш материалда­рын жасауға және химия, биология, физика, математика мен информатика саласындағы бас­­қа да жобаларға арналды. Түр­кіс­тан қаласында өткен бас­ты іс-шарада «Назарбаев зият­керлік мектептері» ДББҰ қыз­меткерлері әзірлеген оқу және цифрлы ресурс­тар жәр­меңкесіне оқулықтар, оқу-әдістемелік кешендер, жи­­нақ­тар, оқушылардың оқу жетістіктерін бағалауға арнал­ған нұсқаулықтар қойылды. Аталған ұйымның басқарма төрайымы Күләш Шәмшидинова мен Түркістан облысы әкімінің орынбасары Сәкен Қалқаманов дарынды оқушылардың ғылыми жобаларын көрді. Мысалы, «Жүйелік-әдістемелік кешен» онлайн платформасы, 3D форматындағы NIS LAB вир­туалды зертханасы, NIS MEET POINT ашық онлайн алаңы көрсетілді. Сондай-ақ оқу­шылар «Мен сияқты жаса» тақырыбындағы STEAM жобаларын таныстырды. Олардың басым бөлігі медицина саласына жасанды интеллекті енгізуге арналған. Мысалы, Тараз қала­сын­дағы NIS-те әзірленген COVID-19 клиникалық симп­томдарды бақылау жүйесі Жам­был облысындағы ең үздік стартап аталып, республикалық ғылыми жобалар байқауында екінші орынды жеңіп алды. Бұл жоба Тараз қалалық көпсалалы ауруханасына қолданысқа берілген. «Құрылғының негізгі тиімділігі – арақашықтықты сақтай отырып, дәрігерлерге температураны, сатурация мен жүрек соғу жиілігін анықтауға көмектеседі. Мысалы, қазір менің температурам 36-ны көрсетіп тұр. Жүрек соғу 44 және сотурациям – 94. Дені сау адамдарда сатурация 93-тен кем болмау керек. Одан аз болса онда ол адамның денсаулығында кінәрат бар деген сөз», дейді Тараз қаласындағы Назарбаев зияткерлік мектебінің оқушысы Камилла Машанло.

Сонымен қатар қатысушылар қолданыстан шыққан «Екінші өмір» техникасын пайдаланатын экологиялық зерттеулерін қорғады. К.Шәмшидинова Нау­рыз кездесулерінің ең негізгі міндеті – балалардың әр пән бо­йынша алған білімін практикада іске асыру екенін айтады. «Оның сыртында біз осы облыстағы мектеп мұғалімдерін оқытып жатырмыз. Бізден үйренген дүниесін ертең барып ауылға, өздерінің әріптестеріне үйретсін», дейді К.Шәмшидинова.

Түркістандағы іс-шара барысында оқу дрондары ұшырылып, «Алтын сақа» және «Ең сейсмотөзімді ғимарат» командалық ойындары, жас өнертапқыштар құрастырған автокөліктер жарысы ұйымдастырылды. Сондай-ақ оқушылар Наурыз кездесулерінің мәдени бағдарламасы аясында Қожа Ахмет Ясауи кесенесі, Арыстан баб, Отырар төбе, «Ұлы дала мұражайы» және Керуен сарайында болды.

 

Түркістан облысы

Соңғы жаңалықтар

Доллар қымбаттады

Экономика • Бүгін, 16:15

Күзде ауа райы қандай болады

Ауа райы • Бүгін, 13:33

Ұқсас жаңалықтар