Конференцияны «Дарын» мемлекеттік жастар сыйлығының лауреаты, Қазақстан Республикасының еңбек сіңірген қайраткері Дәулеткерей Кәпұлы ашып, жүргізіп отырды. Алғашқы сөзді облыс әкімінің орынбасары Ғани Нығыметов алып, Алматы мен Нұр-Сұлтаннан келген қадірлі қонақтарға ризашылығын білдіріп, жерлес жазушыларымыздың есімін облыс тұрғындары мақтан ететінін, жас ұрпақты тәрбиелеуде олардың шығармашылығы мен өнегесі әрқашан үлгі екенін атап өтті. «Бүкіл Қазақстан халқы біздің жерлесіміз Ғабит Мүсіреповтің шығармаларын, сонымен қатар оның ұлттық әдебиетіміздің өсіп-өркендеу және даму жолында ерен еңбек еткенін жақсы біледі. Биыл айтулы тұлғаның мерейтойы барлық мәдениет орындары мен мектептерде аталып өтуде.
Сонымен қатар қабырғалы қаламгер Сафуан Шаймерденовтің 100 атақты ақынымыз Кәкімбек Салықовтың 90 жылдығы да кеңінен тойлануда. Біз осындай жерлестерімізді мақтан тұтамыз», деді ол.
Конференцияда Қазақстанның еңбек сіңірген қайраткері, «Парасат» және «Құрмет» ордендерінің иегері, халықаралық айтыс ақындары мен жыршы-термешілер одағының төрағасы, ақын Жүрсін Ерман, Жазушылар одағы төрағасының бірінші орынбасары Ақберен Елгезек және т.б. құттықтау сөздерін айтты. А.Елгезектің бір сөзінде Қазақстан Жазушылар одағын Солтүстік Қазақстан облысынан шыққан С.Мұқанов, Ғ.Мүсірепов және Ғ.Тоғжанов сияқты үш бірдей қайраткердің басқарғанын және ондай жетістік басқа бірде-бір облыстан шықпағанын еске салғаны көпшілікті еріксіз елең еткізді. Сонымен қатар ол Ғабеңнің төраға болғандағы ерліктерін, Алматының қақ ортасынан Жазушылар одағына ғимарат алып бергенін де ауызға алғаны жиналған қауымның құлағына жағып отырды. Баяндамашылар қатарында болған «Солтүстік Қазақстан» облыстық газетінің бас директоры Жарасбай Сүлейменов «Тәуелсіздік жылдарындағы Солтүстік Қазақстан облысындағы әдебиеттің дамуы», Қазақстанның еңбек сіңірген қайраткері, ақын Ғалым Жайлыбай «Кәкімбек Салықов – қайраткер, ақын, азамат», «Егемен Қазақстан» газетінің Солтүстік Қазақстандағы меншікті тілшісі Жақсыбай Самрат Ғабит Мүсіреповке арналған «Могиканның соңғы тұяғы», М.Қозыбаев атындағы Солтүстік Қазақстан университетінің профессоры, филология ғылымдарының кандидаты Жанар Таласпаева «Сафуан Шаймерденов – көркемсөз шебері» атты баяндамаларын оқыды.
Осы кеште солтүстікқазақстандық жас жазушылар Аманжол Зағыпардың «Тағдырымның тамшылары», Нұргүл Оқашеваның «Нұр», Сағындық Сәбитұлының «Дөңдегі ауыл» және Қызылжар ақындары антологиясының тұсаукесер рәсімі болды. Төрт кітап та облыстық әкімдіктің қолдауымен жарық көрген.
Кеш барысында Сафуан Шаймерденовтің немере інісі Сайын Есмағи сөз алып жазушының есімін халықтың есінде сақтау бағытында атқарылмай жатқан істер туралы өзінің өкінішті ойларын жеткізді. Оған облыс әкімінің орынбасары Ғани Нығыметов жауап беріп, сынның орынды екенін, оны түзетуге күш салынатынын жеткізді.
Кеш соңында Жазушылар одағы төрағасының бірінші орынбасары Ақберен Елгезек жергілікті жас ақындар Аманжол Зағыпар, Күлайхан Рахмет, Нұргүл Оқашеваны және прозашы Сағынды Сәбитұлын Жазушылар одағына мүшелікке қабылдап, жазушы куәлігін тапсырды.
Ал ертесіне осы тақырыпта республикалық ақындар айтысы өтті. Оны жыршы-термешілер одағының төрағасы Жүрсін Ерман жүргізді. Айтысқа Қазақстанның барлық түкпірінен Рүстем Қайыртай, Еркебұлан Қайназар, Қалижан Білдәш, Мейірбек Сұлтанхан, Төлеген Жаманов және т.б. жүйріктер қатысып, қомақты жүлдені сарапқа салды.
Солтүстік Қазақстан облысы
