Жиынға қатысушылар қазақ сатирасының дамуына зор үлес қосқан ғалымның өмірі мен шығармашылығына қатысты естеліктерімен бөлісті. «Қожакеевтің құнды қазынасы» баяндамасында Қазақстан Жазушылар одағы Сатира кеңесінің төрағасы Ермахан Шайхы «Темірбек Қожакеұлы – қазақ сатирасын егжей-тегжейлі зерттеп, сатиралық жанрлар жүйесін жете зерделеген һәм теориялық жағынан негіздеген ғалым. Бұған дейін қазақ әде-биеттану ғылымында сатира мен юморды терең зерттеп, талдаған ғалым болған жоқ. Ғалымның қаламынан туған ғылыми еңбектерді жинақтаса, қазақ сатирасының энциклопедиясы секілді толымды дүние әрі болашақ оқырмандар мен жас зерттеушілер үшін аса құнды ғылыми еңбек болар еді», деп атап өтті. Е.Шайхы және де студенттік жылдарды еске ала отырып, ұстаздың ғибратты ғұмыры, қазақ баспасөзінің дамуына қосқан үлесі, шәкірттеріне деген талапшылдығы хақында ой толғады.
Әл-Фараби атындағы ҚазҰУ журналистика факультетінің деканы Сансызбай Мәдиев есімі журналистика факультетімен қатар аталатын Темірбек Қожакеев мұрасының бүгіні ғана емес, келер ұрпақ үшін де құнды екенін еске салса, ұстазын «Темірдей тәртіптің адамы болатын» деп атап өткен Жазушылар одағы басқармасы төрағасының орынбасары, филология ғылымдарының докторы, профессор Бауыржан Жақып шәкірт әрі әріптес болған жылдардағы естеліктерімен бөлісті.
Осы жиында сондай-ақ сатирик Т.Әлімбекұлы, А.Ясауи атындағы ҚТУ профессоры Б.Сердәлі, ХАТУ Медиакоммуникация және Қазақстан тарихы кафедрасының профессоры А.Бейсенқұлов, сатирик, Жамбыл радиосының жетекшісі Б.Советұлы, Халықаралық «Алаш» сыйлығының лауреаты Н.Қалқа, «Шалқар» радиосының директоры Б.Төлепберген, Әл-Фараби атынағы ҚазҰУ доценттері Г.Өзбекова, Р.Жақсылықбаева, Л.Н.Гумилев атындағы ЕҰУ кафедра меңгерушісі Г.Әшірбекова, Әл-Фараби атындағы ҚазҰУ Баспасөз және элекронды бақ кафедрасының меңгерушісі Г.Сұлтанбаева, тағы басқа да ғалымдар ұстаз мұрасына қатысты баяндама жасап, ойларын ортаға салды.
Жамбыл облысы Меркі ауданы Т.Қожакеев атындағы №39 жалпы орта мектеп гимназиясының «Қожакеевтанушылар» клубының мүшелері де осы жиынға қатысты. Ал публицистика, ғылыми жұмыс және мультимедиалық жобалар аталымы бойынша Қожакеев отбасы тағайындаған шәкіртақыға 9 студенттік жұмыс лайықты деп табылды.
Осы іс-шараға орай Әл-Фараби кітапханасында ақпараттық-құжаттық көрме ұйымдастырылып, оқырмандарға кітапхана қорынан ғалымның өмірі мен шығармашылығы туралы материалдар таныстырылды. «Қайталанбас нар тұлға», «Темірбек Қожакеев – ұстаз, ғалым, қайраткер» тақырыбында жалғасқан игі шаралар ғалымның қазақ әдебиеті мен журналистикасына, сондай-ақ ұлттық сатираның дамуына арнаған еңбектерінің уақыт талабымен үндескендігін айшықтай түсті.
АЛМАТЫ
