Аймақтар • 30 Наурыз, 2022

Жақсыгелдінің баяны

370 рет
көрсетілді
1 мин
оқу үшін

Жезқазған тарихи-архео­логиялық мұражайы аса құнды жәдігерлермен толықты. Мем­лекет және қоғам қайрат­кері Мәди Артығалиев пен Қа­зақстанның құрметті журналисі Әли Тойжігіт кезінде белгілі әнші, композитор Жақсыгелді Сейі­лов пайдаланған жеке заттарды мұражай қорына табыс етті.

Жақсыгелдінің баяны

Нақты айтқанда, өнер тарланының баяны мен дипломаты алдағы уақытта музейге келуші қауымның назарына ұсынылатын болады.

«Өз есіміңді тарихта қалдыр!» акциясы аясында өткен іс-шара барысында Жезқазған тарихи-археологиялық мұражайының аға ғылыми қызметкері Еркебұлан Камалиев болашақта Жақ­сыгелді Сейіловке арналған экспозиция ашу жоспарда бар екенін хабарлады.

Еске салар болсақ, Жақсыгелді Сейілов зағиптығына қарамастан, өнер өлкесінде өзіндік қолтаңбасын қалдырған қайраткер тұлға. Бір басында бірнеше өнер тоғысқан музыка маэстросының репертуарында 50-ге тарта шығарма болған. Оның ішінде «Ана туралы баллада», «Ұлытау», «Әке туралы ой», «Кездесу», «Неге солай», «Сүйінші» сияқты әндері тыңдарман қауымнан жоғары баға алған. Сонымен қатар композитордың Жезқазған қаласының әнұранына айналған «Жезқазған маршы» композициясын да айта кетуге болады.

Ал музей қорына тапсырылған баян жеке қолда ширек ғасыр сақталып келсе, өнер иесі ұстаған дипломат-портфель 42 жыл бойы сандық түбінде жатыпты.

 

Қарағанды облысы,

Жезқазған қаласы