«Шын мәнінде, бұл Жаңа Қазақстанды құру кезеңінің бастамасы. Осы орайда реформа мазмұнының ауқымдылығына цифрлар дәлел бола алады. Бір ғана Конституцияның өзіне 30-дан астам бапқа, сонымен қатар 7 конституциялық заң мен 15-тен астам заңға өзгерістер енгізу жоспарланып отыр. Президенттің өкілеттілігін шектеу, сайлау үрдісін жаңғырту, саяси партияларды тіркеу тәртібін жеңілдету, сот және құқық қорғау жүйесін жетілдіру, азаматтардың негізгі құқықтарын қорғау, азаматтық қоғам институттары мен бұқаралық ақпарат құралдарының рөлін күшейту сияқты маңызды міндеттер уақыттың еншісінде. Ал қоғамдық диалогтың біртұтас үлгісін қалыптастыру үшін билік пен халық арасындағы өзара іс-қимылды күшейтетін «Ұлттық құрылтай» құрылады. Бұл ретте жұмыс істеп тұрған барлық қоғамдық кеңестің қызметі жүйеленіп, олардың мүшелері Ұлттық құрылтайдың құрамына енетін болады. Бұл шаралар азаматтық қоғам институттарының рөлін күшейтуге бағытталып отыр», деді Қанат Мусин.
Министрдің айтуынша, Әділет министрлігі Жолдауды іске асыру үшін нормативтік-құқықтық тараптан қамтамасыз ететін болады.
Кездесу барысында министр қала тұрғындарын, қоғам белсенділерін мазалаған сауалдарға жауап берді. Оның ішінде саяси партияларды, меншік иелерінің бірлестігін, тауарлық белгіні тіркеу, халықтың құқықтық сауаттылығын көтеру, жеке азаматтарды банкрот деп тануға бағытталған заң жобасы, нотариустар көрсететін қызметтің сапасы, сонымен қатар заң мамандықтары бойынша кәсіби кадрларды даярлау бағытында сұрақтарға жауап берді. Сондай-ақ азаматтарды жеке қабылдаған министр жұртты жеке сот орындаушыларының төлем қызметін өзгерту, атқарушылық қызметтің реформасы, жеке мүлік иелері бірлестігін тіркеу мәселелері мазалайтынын жеткізді.
Жиында министр Әділет органдарының жұмысына да тоқталып өтті. Ведомство басшысының айтуынша, сот актілерін орындау Әділет органдары қызметінің маңызды бағыттарының бірі. «Жыл сайын 1 миллиондай құжат өңдеуден өтеді. Алматы қаласы бойынша бүгінде 24 мемлекеттік және 319 жеке сот орындаушысы бар. Өткен жылы кепілдендірілген заң көмегін көрсетуге көзделген 6 млн теңгеден астам қаражат толығымен игерілген. Ал азаматтарға заңгерлік қызмет көрсету саласында өңірлік заңгерлік бірлестіктер де ауқымды жұмыстар атқаруда. Қала бойынша 12 мыңнан астам азаматқа тегін заң көмегі көрсетілген.
АЛМАТЫ
