Ең бастысы, данышпан, дана Абай даңқы тағы бір асқақтады. Жер жәннаты Жетісу қанатын қайта жайды. Ұлт ұясы Ұлытау тарих сахнасына шықты. Жаңа облыстардың аты да, заты да – қазақ байтағының ұлылығын, кең шалқар пейілін, байлық-берекесін, ырыс-ынтымағын паш еткендей, барынша көзге ыстық, жүрекке жақын атаулар. Сондай-ақ Қапшағай қаласының халқымыздың тау тұлғаларының бірі, аяулы Дінмұхамед Ахметұлы Қонаев есімімен аталуы да көпшіліктің көптен көкейінде жүрген қалаулы бір шара еді. Оның да орайы енді келді.
Қарағанды, Жезқазған өңірінде тұрғындармен кездескенде, ел ағаларымен пікірлескенде осы мәселелерге жиі назар аударылушы еді. Есті азаматтардың барлығы дерлік түрлі себептермен біраз тұсалып, тоқырап қалған ел тіршілігіне нәр берудің, жан бітірудің қасқа бір жолы осы деген ойға табан тірей беруші еді. Мемлекет басшысы осы талап-тілектердің тамырын тап басты. Ақ түйенің қарны жарылғандай, аспаннан шұға жауғандай, ақ жарылқап күн болды бұл!
Кейбір керітартпа ағайындар осынша жаңа құрылымдардың ел экономикасына әсері қалай болады дегенді де айтып жатыр. Меніңше, оң, тек оң әсері болады! Мәселен, Жезқазған облыс мәртебесінен айырылғалы бері ептеп етек-жеңін жинап алған «Қазақмыс» сынды алпауыт кәсіпорындар қайта қайырылып, жаңаша жағдайда, тың қарқынмен еңбек ететіні сөзсіз. Сонымен қатар оң өзгерістер Ұлытауға іргелес жатқан Қызылорда облысы, Торғай-Арқалық аумағын да қамтымақ. Кәсіпкерлікке жан-жақты қолдау көрсетіліп, жаңа жұмыс орындары көптеп ашылады. Қаңырап қалған қалаға ел оралады, тусырап жатқан далаға мал толады, еңбек дабылы қайта қағылады. Бір сөзбен, бұл шешімдердің стратегиялық мән-маңызы ерекше.
Мемлекет басшысы елдің алдағы әлеуметтік-экономикалық дамуының негізгі бағыттары туралы тарқатып айта келіп, қорытынды сөзінде: «Мен үшін ең бастысы – елдің амандығы, жердің тұтастығы. Тәуелсіздікті тұрақты, баянды етудің бірден бір кілті осы екі ұстын» деп атап көрсетті. Қазіргі күрделі жағдайда алдымызда тұрған басты міндет – саяси, әлеуметтік-экономикалық тұрақтылықты, жұмыс орындарын және халықтың әлеуетін, әл-ауқатын сақтап қалу. Сол тұрғыда басым бағыттар айқындалды, нақтылы тапсырмалар берілді. Енді соны жүзеге асыру мақсатында жұмыла жұмыс жүргізу ғана қалды.
Нұрлан ДУЛАТБЕКОВ,
ҰҒА корреспондент-мүшесі, заң ғылымдарының докторы,
академик Е.А.Бөкетов атындағы Қарағанды университетінің ректоры
ҚАРАҒАНДЫ
