Отандық өнімнің бәсекеге қабілетсіздігін айтушылар да бар. Түркістандықтар дастарқанынан үзілмейтін қызанақ пен қиярдың әлеуметтік маңызы бар азық-түлік тауарларының қатарынан шығып қалуын да бағасының қымбаттауымен байланыстырады.
Әйтпесе негізінен осы қызанақ пен қиярды өндіретін жылыжайлардың жалпы көлемі облыста 1 467 гектарды құрап, республикадағы жылыжай аумағының 71%-ын иемденуде. Яғни өңірде 3 366 жылыжай бар. Сондай-ақ биыл Түркістанда 50 гектар аумаққа заманауи үлгідегі жылыжай кешенін салу жоспарлануда. Қазіргі таңда инвесторлар анықталып, инфрақұрылым мәселесі қаралуда. «Әлеуметтік маңызы бар өнімдердің тапшылығын тудырмау мақсатында картоп 8,5 мың гектарға, пияз 2 мың гектарға және сәбіз 2 мың гектарға егілуде. Егістік жерлерді ағын сумен қамтамасыз ету үшін 52 шақырым каналды бетондау, 241 шақырым каналдарға механикалық тазалау жұмыстары жүргізілді», дейді облыстық ауыл шаруашылығы басқармасының басшысы Нұрбек Бадырақов.
Жылыжай және оның өнімдерінің бағасы жөнінде «Оңтүстік Қазақстан жылыжайлары қауымдастығы» жеке кәсіпкерлер мен заңды тұлғалар бірлестігінің өкілдері де Мәжіліс депутаттарының өңірлерде болған сапарлары кезінде дабыл көтерген болатын. Нәтижесінде, жылыжай саласының күрделі жағдайынан хабардар болған депутаттар Ауыл шаруашылығының министрі Е.Қарашөкеевке сауал жолдады.
«Елдің оңтүстігінде жылыжай көкөніс шаруашылығы ауыл шаруашылығының жетекші саласы болуы керек. Өкінішке қарай, ерте шығатын көкөністердің қазіргі құны қымбат, көптеген қазақстандық үшін бағасы қолжетімсіз болатыны, әкімдердің базардағы бағамен жағаласып шапқылайтыны да белгілі. Себебіне үңіліп, зерттеген жан бар ма? Қауымдастық ұсынған есеп-қисаптар бойынша өнеркәсіптік жылыжайдың бір гектарын жылытып, жарықтандыруға жұмсалатын шығындар сағатына 45 кВт электр энергиясын тұтынуға дейін барады. Оған қоса электр энергиясына, минералдық тыңайтқыштарға, еңбекке ақы төлеуге, күндізгі жарық ұзақтығының қысқаруына байланысты қосымша жарықтандыруға жұмсалатын шығындар және бар. Тиісінше, осындай үлкен шығындар болған кезде көкөністер бағасының желтоқсаннан бастап наурыз-сәуір айларына дейін төмендеуі екіталай. Ауыл шаруашылығы өнімдерін жетекші экспорттаушы елдерде өнімділікті арттыру үшін жасанды қосымша жарықтандыру (күндізгі жарық уақытын ұзарту) қолданылады. Алайда Түркістан облысында коммуналдық қызметтердің қымбат болуына байланысты қосымша жарықтандыруды қолдану тиімсіз.
Бұл проблема 3 жылдан астам уақыт бойы көтеріліп келеді, отандық өнім көрші елдерде (Өзбекстан, Түрікменстан) өндірілген өнімдермен бәсекелесе алмайды. Мысалы, коммуналдық көрсетілетін қызметтер құнын салыстырғанда мынадай: Түркістан облысында 1 кВт электр энергиясының құны 33,17 теңгені құрайды, ал Өзбекстанда – 18 теңге, Түрікменстанда – 2-3 теңге; Түркістан облысында мың текше газдың бағасы – 35 788 теңгені құрайды, Өзбекстанда – фермерлер үшін біздің ұлттық валютаға шаққанда 11 мың теңге, Түрікменстанда бар болғаны 45 теңге. Су бізде 1 текше үшін 262 теңге, ал көрші елдерде тегін. Өңір экологиясын бұзатын көмірдің 1 тоннасы 14 600 теңге. Қысқа қарай ол 20 мың теңгеден асып жығылады. Газ бағасы бойынша да басқа облыстармен салыстырғанда Түркістан облысы 1-орында тұр. Ал Қазақстандағы ең арзан газ Шығыс Қазақстан облысында (мың текше үшін 11 218,76 теңге), Ақтөбе облысында (14 536,37 теңге), Батыс Қазақстан облысында (17 873,39 теңге). Осылайша, еңбек ресурстарының шығындары отандық өнімнің өзіндік құнына үлкен әсер етеді. Қысқасы, нарықта көрші елдің 1 кило өнімі кем дегенде 2 есе арзан, отандық өнім бәсекеге қабілетсіз. Жағдайды оңалту үшін тиісті министрлік шұғыл шаралар қабылдауы қажет деп ойлаймыз», деді депутаттық сауалды жария еткен Дархан Мыңбай.
Бұл орайда яғни баға тұрақтылығын ұстап тұру және жылыжай алаңдарын кеңейту, сондай-ақ азық-түлік қауіпсіздігін қамтамасыз ету мақсатында депутаттар коммуналдық көрсетілетін қызметтерді (электр қуаты, табиғи газ, көмір) арзандатуға арналған шығындардың құнын 50% мөлшерінде субсидиялауды қарастыруды ұсынды. Қуат көздерін субсидиялау және жылыжай шаруашылықтарының несиелерін төлеу мерзімін ұзарту, коммуналдық төлемдерге төленетін тариф көлемін күндізгі және түнгі кезеңге бөліп төлеу тетіктерін қарастыру жөніндегі ұсыныстарын шаруалар өңірге жұмыс сапарымен келген Ауыл шаруашылығы министрі Ербол Қарашөкеевке де жеткізген болатын. Әзірге министрлік тарапынан жауап жоқ.
Түркістан өңірінде бау-бақшалық өнімдердің бағасы да көпшілік көңіліндегідей емес. Бағбандардың уәжіне жүгінсек, оның өзіндік себебі де бар. Мысалы, шетелден әкелінетін тыңайтқыштарды сатып алуға мемлекеттен субсидия бөлінбейді. Оны шаруашылық алдын ала сатып алады, енді бірінің қаржылық жағынан қауқары жетпейді.
«Тыңайтқыштың бағасы шаруалар үшін қымбат. Себебі шетелден импортталады. Бір литрін 5 мың теңгеден сатып алдық. Бізге 300 литр, кейде 400 литр керек. Ал күн суыта берсе, екінші рет себу қажет. Толассыз жауған жаңбыр сол тыңайтқышты шайып кетеді. Бұл жағынан да шығын бар», дейді «Александровский сад» ЖШС басшысы Бақтияр Тағаев.
Ордабасы ауданы Бөржар ауылдық округінде 40 гектар жерге алма және сүйекті жеміс ағаштарын еккен фермер шаруашылығына тамшылатып суару технологиясын енгізген. Қазір бапталған бақта алма, өрік, қара өрік, шабдалы, шие ағаштары бар. Күн жылыған кезде сүйекті жемістер бірден бүршік жарған, алайда наурыздағы суық шаруаларды біраз әбігерге салды.
«Биыл жаңбыр көп жауды. Қыстың аяғы, көктемнің басындағы суықтан сүйекті жемістердің гүлін үсік ұрып кету қаупі жоғары. Биыл өнім көлемі екі есеге азайып кетуі де мүмкін. Өнімнің сапасы ауа райына тікелей байланысты – күн жылы болса, жақсы гүлдейді, соған сай жақсы өнім береді», дейді Бақтияр Тағаев.
Шаруаның айтуынша, бақтағы жеміс ағаштарының 80%-ы өнім беруі мүмкін. Фермер Ауыл шаруашылығы министрі Ербол Қарашөкеевке өнімді, арнайы қоймаларды, ауыл шаруашылығы техникасы мен құрал-жабдығын сақтандыру мәселесін жеткізіпті.
«Ауыл шаруашылығы саласында кредит беру шарттары шаруаларға қолжетімсіз болып отыр. Яғни берілетін кредиттің пайызы жоғары – шаруа шаруашылығын ашу үшін 17%-бен қарыз алады. Бұл – бірінші. Екінші мәселе – кредит алу үшін кепіл қою. Мұнда алынатын кредит сомасына 120%-ға кепіл қою керек. Кепіл құны да төмен бағаланады. Әсіресе, шаруа жерін кепілге қойған кезде қаржы институттары оны өте төмен бағалайды. Ауыл шаруашылығында түрлі мәселе болады. Ауа райына байланысты өнім үсіп кетеді. Сондай кезде фермердің дәлелді себебі барына қарамастан, қаржыландыру институттары оларды қолдау позициясын ұстанбайды. Яғни нақты себебі болғанына қарамастан, кредитті мезгілінде өтей алмайтын шаруаға кредит уақытын шегеруге мүмкіндік қарастырылмаған», дейді фермер.
Шаруалар алма, өрік, қара өрік, жүзім өсіруге ауа райы қолайлы оңтүстік өңірлерде келешекте жаңғақ ағашына арналған ұзақ мерзімді мемлекеттік бағдарлама қажет екенін айтуда.
Былтыр құрылған Түркістан, Алматы, Жамбыл облысында жеміс өсіру, сақтау, сатумен айналысатын кәсіпкерлердің басын қосатын «Қазақстан бақтары» консорциумының төрағасы Нұрлан Құралов оңтүстік өңірде гүлдеп үлгерген жеміс ағаштарының 20%-ы үсіп кеткенін айтады. «Бау-бақшаны сақтандыруды енгізу қажет. Сақтандырумен айналысатын компаниялар бар, Ауыл шаруашылығы министрлігі солармен келісіп, жемістің белгілі бір бөлігі үсіп кетсе, соны өтеу бойынша келісім орнатуы қажет. Әрине, шаруалар шығынның толық өтелгенін қалайды, екінші тарап өз ұсынысын айтып, ортақ келісімге келуге болады», дейді Н.Құралов.
Облыстық ауыл шаруашылығы басқармасының хабарлауынша, минералды тыңайтқыштардың құнын субсидиялау бағдарламасына 4,5 млрд теңге қарастырылған. Нәтижесінде, 475 түрлі минералды тыңайтқыштардың құны 50% субсидияланып, 368,1 мың гектар егістікті тыңайту жоспарлануда. Тыңайтқыш тапшылығын болдырмау мақсатында «ҚазАзот» АҚ-мен облыс ауыл шаруашылығы тауарын өндірушілерге қажетті аммиак селитрасын уақтылы және толық көлемде жеткізу туралы арнайы меморандум түзілген.
Әлеуметтік маңызы бар өнімдерді Батыс Қазақстан, Атырау, Қостанай, Шығыс Қазақстан, Павлодар облыстары мен Алматы қаласына жеткізу жөнінде облыс әкімдіктерімен меморандумдар түзілген. Жалпы, биыл облыста егіс көлемі 848,4 мың гектар алқапқа ауыл шаруашылығы дақылдары егіледі. Өткен жылмен салыстырғанда егіс алқабы 3 мың гектарға артып отыр. Ауыл шаруашылығы басқармасының басшысы Нұрбек Бадырақовтың айтуынша, егістікті әртараптандыруға сәйкес, биыл мал азығы дақылдарына көңіл бөлініп, егіс көлемі 13 мың гектарға артып, жалпы 228 мың га алқапқа егіледі.
«Бүгінгі таңда жоспарланған жаздық дақылдардың 21%-ы егілді. Өткен жылмен салыстырғанда көктемгі дала жұмыстары бір аптаға ерте басталды. Биылғы көктемгі дала жұмыстарына 22 701 бірлік ауылшаруашылық техникасы қатысуда. Жоспарланған жер жырту жұмыстары 95%-ға орындалды, 106 мың гектар жерде сор шаю жұмыстары толықтай жүргізілді. Биылғы жылдың өнімі үшін егілген 177 мың гектар күздік бидайдың жағдайы жақсы. Қоректендіру жұмыстары жүргізіліп жатыр. Жалпы, Түркістан облысындағы ауылшаруашылық дақылдары 100% тұқыммен қамтамасыз етілді. Осы тұқымдардың 50%-ы субсидиялау мақсатында 600 млн теңге қаржы бөлінді. Бұдан бөлек, көктемгі дала жұмыстарын жүргізу үшін Аграрлық несие корпорациясынан 6%-бен 5,3 млрд теңге несие қаржы қаралып, 3,6 млрд теңгесі 783 тауар өндірушіге таратылды. Бұдан бөлек 60 мың тонна минералды тыңайтқышты дер кезінде жеткізу үшін «ҚазАзот» ЖШС келісімшарт жасалды.
Бүгінгі таңда облыста осы қажеттіліктің 50%-ы бар, 10 мың тоннасы таратылды, 25 мың тоннасы қоймада тұр, тауар өндірушілерге күнделікті келісімшартқа сәйкес босатылуда», деді басқарма басшысы.
Сонымен қатар облыста 47 900 тонна жанар-жағармай арзандатылған бағамен беріледі. Бүгінде 18 мың тонна жанар-жағармайдың құны толығымен төленіп, тауар өндірушілерге 6 300 тоннасы босатылған. Бағасы тауар өндірушілерге жеткізіп беру құнын қоса алғанда 193-195 теңгеден сатылуда. Яғни өңірде көктемгі дала жұмыстарын оңтайлы мерзімде атқару мақсатында диқандарға мүмкіндік жасалуда. Дегенмен бүгінгі баға жыл бойы үзілмейтін көкөнісі де, жеміс-жидегі де мол дерлік түркістандықтардың тәбетіне кері әсерін тигізіп тұр.
Түркістан облысы