Қоғам • 14 Сәуір, 2022

«Қазақстан халқына» қоры балалардың шетелде емделуіне көмек берді

«Қазақстан халқына» қоры жүрек ақауының өте ауыр диагнозымен туған Мұса есімді баланың Оңтүстік Кореяға медициналық авиатасымалдау ақысын төлеп берді, деп хабарлайды Egemen.kz қордың баспасөз қызметіне сілтеме жасай отырып.

Ажар ҚАНАТБЕКҚЫЗЫ

Қордың таратқан мәлімдемесіне сүйенсек, Қор кішкентай Мұсаның Оңтүстік Кореяға медициналық авиатасымалдау ақысын төлеп берген. Балақайдың туа біткен жүрек ақауының өте ауыр түрі диагнозы бар.

«Алты айлық Мұса Сұлташев ата-анасымен бірге Атырау облысынан Кореяның Сеул қаласындағы INCHEON SEJONG HOSPITAL медициналық мекемесіне тікелей арнайы рейспен ұшты», деп жазылған ұйымның баспасөз хабарламасында.

Мұсаның шетелде емделу ақысын өзге қайырымдылық ұйым толығымен өтеп берген. Сол себепті баланың ата-анасы «Қазақстан халқына» қорына медициналық транспорттау ақысын төлеуге өтініш білдірген.

«Ұшақпен сапар 12 сағатқа созылды, оңай болған жоқ, бірақ біздің кішкентай батыр шыдамды болды. Енді емді бастаймыз», дейді баланың әкесі Ж. Сұлташев.

Сондай-ақ қор Батыс Қазақстан облысы, Ақсай қаласының кішкентай тұрғынына Ресейдің Мәскеу қаласындағы В.И. Кулаков атындағы «Акушерлік, гинекология және перинатология ұлттық медициналық ғылыми орталығында» жасалатын отаның ақысын төлеп беретін болды.

«Құзыретті органның медициналық қорытындысын зерделеген Сараптамалық комиссияның ұсынымы бойынша қор науқастың екінші отасын емдеу курсын төлеу туралы шешім қабылдады. Қазір қыз бала ата-анасымен бірге ауыр ота жасату үшін сапарға дайындалып жатыр. Кішкентай қазақстандықтардың өмірін сақтап қалу үшін қордан 52 миллион теңге бөлінді», деп жазылған қордың ақпаратында.

Еске салсақ, «Қазақстан халқына» қоры арқылы әлемдегі ең қымбат дәріні кімдер алғаны айтылған еді.

Күннің маңызды және өзекті жаңалықтарын «Егемен Қазақстан» телеграм каналынан оқыңыз