Судьялар қызметі жаңа деңгейге көтерілуі тиіс

Мемлекет басшысы Нұрсұлтан Назарбаев Жоғарғы Сот Төрағасы Қайрат Мәмиді қабылдады, деп хабарлады Президенттің баспасөз қызметі. Кездесуде сот төрелігін ат­қа­рудың қазіргі кезеңдегі жай-күйі, сондай-ақ, соттардың қызметін одан әрі жетілдіру жөніндегі перс­пективалық міндеттер талқы­ланды. Нұрсұлтан Назарбаев судья­лар­дың саны артқанын және олардың жұмысын жақсарту үшін барлық қажетті жағдайлар жасалғанын атап өтті. Осыған байланысты Мемлекет басшысы қазақстандық судьялардың қызметі алдағы уақытта сапалы жаңа деңгейге көтерілуі тиістігіне тоқталды. Жоғарғы Сот Төрағасы Мем­лекет бас­шысының VI судьялар съезіндегі тапсырмалары­ның іске асырылу барысы, сот өндірісін жеңілдету, сот қызметінде төре­шіл­дік ресімдерді азайту жөнін­де жүргізілген жұмыстар мен аза­маттардың құқықтарын қорғауды күшейтуге, сот төрелігін атқару сапасын жақсартуға бағытталған шаралар туралы баяндады. Қ.Мәми сот төрелігін атқару үдерісіне араласудың алдын алу, сондай-ақ, сот билігінің имиджін нығайтуға бағытталған өзге де мәселелерді қарастырған, сот би­лігінің тәуелсіздігі индексін көтеру жөніндегі Жоғарғы Сот әзірлеген іс-шаралар жоспары туралы хабардар етті. Бұдан бөлек, Жоғарғы Сот Тө­р­ағасы сот төрелігіне қолжетімділікті арттыруды, істерді қараудың сот­қа қатысушыларға ыңғайлы тәрті­бін, бітістіру үдерістерін кеңі­нен қол­дану мен заманауи тех­но­ло­гия­ларды пайдалануды қа­рас­ты­ратын Азаматтық іс-жүр­гізу ко­дек­сінің жаңа жобасына қатысты жұ­мыс­тардың барысы туралы баяндады. Кездесу қорытындысында Мем­­лекет басшысы елдің сот жүйе­­сін әрі қарай дамыту жөнінде бір­­қатар тапсырмалар берді. ----------------------------------------- Суретті түсіргендер С.БОНДАРЕНКО, Б.ОТАРБАЕВ.