Қазіргі таңда су қоймасынан қармақпен де балық аулауға болмайды. Өйткені уылдырық шашу кезеңі. Осы аралықта инспекторлар бақылау шараларын күшейтеді. Өйткені балық емін-еркін уылдырық шашатын болса, одан шығатын шабақтардың да көбейіп, балық санының артуына сеп болады. Маусым ашылысымен инспекторлар балық аулаушыларға қажетті түсіндірме жұмыстарын жүргізіп, тұрмыстық қалдықтарды арнайы орындарға тастауды ескертіп отырады. Балық инспекциясы мамандарының айтуынша, судағы қалдықтар балықтардың жетілуіне зиянын тигізеді. Дегенмен ескертуге немқұрайды қарайтын, талаптарды орындамайтын жағдайлар көп кездеседі. Қоқыстардың тонналап жиналуы сол немқұрайдылықтың бір көрінісі. Мысалы, өткен жылы Түркістан облысының су қоймаларынан шығарылған қоқыс 60 мың тоннаға жуықтады. Ал күні кешегі жергiлiктi атқарушы органдар, табиғат қорғау мекемелерi, табиғат пайдаланушылары, ерiктiлер, қоғамдық, ғылыми ұйымдардың өкілдері, су айдындарына жақын орналасқан тұрғындар мен оқу орындарының студенттері қатысқан акцияның бір күнінде 5 тонна қоқыс жиналып, 200-ге жуық балық құтқарылды. Аумағы 72 мың гектар Шардара су қоймасынан 30 мың метрге жуық иесіз балық аулау торлары арнайы қайықтардың көмегімен су ұлтанынан шығарылды. Су қоймасы аумағын тазалауға 200-ге жуық табиғат жанашырлары қатысты, 15 техника, 9 бірлік су көлігі жұмылдырылды.
«Мұндай акциялар болашақ ұрпаққа су қоймаларымыздың биоалуантүрлілігін сақтау үшін үлкен маңызға ие. Бүгінгі акция аясындағы жұмыстар сөзсіз қоршаған ортаға көп пайда әкеледі», деген Арал-Сырдария облысаралық балық шаруашылығы инспекциясының басшысы Пазылбек Нәлібаев көпшілікті су айдындарында, балық ресурстары мен басқа да су жануарларының тіршілік ету орталарында тазалықты сақтауға шақырды.
Табиғатты таза күйінде келешек ұрпаққа сақтауда еліміз үшін мұндай шаралардың маңыздылығы жоғары екеніне тоқталып, барша қатысушыға алғыс білдірді. Айта кетелік, табиғат қорғау акциясы барлық балық шаруашылығы су айдындары мен учаскелерінде 31 мамырға дейiн өткізілмек.
Жалпы, Түркістан облысы аумағында тауарлы балық өсіруге жарамды 134 өзен-көл бар. Оның ішінде 88 жергілікті маңызы бар су айдыны балық шаруашылығы мақсатында табиғат пайдаланушыларға берілген. Мысалы, Сайрам ауданындағы «Көмеш балық» балық өнімдерін өндіру шаруашылығының иелігіне 17 өзен кіреді. Балықтың сан алуан түрінің күтімімен айналысатын мекеме жылына 500 тоннаға дейін балық өсіреді. Бүгінгі таңда өңірде балық шаруашылығының қуаттылығы жылына 8 мың тоннадан асады. Бұл кәсіппен 133 кәсіпорын айналысады. Сондай-ақ мемлекет тарапынан акваөсіруге пайдаланылатын азықты сатып алуға жұмсалатын шығындардың 30%-ын субсидиялау бағдарламасы балық шаруашылығын дамытуға оң ықпалын тигізуде. Сарапшылар облыстағы жасанды су қоймаларында балық өсіру саласының жоғары әлеуетін айтуда. Өңірдің тауар өндірушілері жылына 2 мың тоннадай балық өнімін Әзербайжан, Грузия, Израиль, Ресей, Қытай және Өзбекстанға экспорттайды.
Түркістан облысы
