Қазақстан Республикасының Президенті Қасым-Жомарт Тоқаев өскелең ұрпақтың болашағын бүгіннен қамтамасыз ету қажеттігін айта келе, жаңа кірген Барыс жылын «Балалар жылы» деп жариялады. Ұрпақты ұлтының жалғасы деп таныған бабалар аманаты мемлекеттің жарқын болашағын айқындауға арналған барлық маңызды бағдарламадан көрініс табуы осы көрме іспетті мазмұны терең шаралардан бастау алады.
Балалардың шығармашылық тұлғасын қалыптастыру және эстетикалық тәрбиесін дамытуды мақсат еткен көрме түрлі тақырыпты ортақ идеяға топтастырған. Әлемді ақ-қара түспен емес, қызылды-жасылды ашық бояу түсімен, бақыт пен бейбітшіліктің үйлесімімен қабылдайтын бала танымын дәл әрі жан-жақты зерделеген Мемлекеттік орталық музей директорының орынбасары Бибігүл Дәндіқарақызы: «Жас ұрпақтың рухани үйлесімді тұлғасын, Отанымыздың көркемдік әлеуетін дамыту үшін балаларды ерте жастан өнерге деген сүйіспеншілігін өрістетіп, тәрбиелеу қажет. Олардың сұлулыққа деген құштарлығы – ересек суретшілер үшін үлгі. Қазіргі уақытта еліміздің педагогикалық қоғамдастығы өскелең ұрпақты ұлттық бейнелеу өнерінің құпиялары мен қыр-сырына үйрету үшін тынымсыз еңбек етуде, өнер арқылы оларды қазіргі заманғы көркем бағыттармен таныстырып, эстетикалық тәрбиені, сұлулықты бала бойына сіңіру үшін ізденісін арттырып келеді», деді.
Көрмеге еліміздің түкпір-түкпірінен іріктелген 7 мен 18 жас аралығындағы дарынды балалардың шығармашылық жұмысы қойылды. Әртүрлі техникадағы және ағаш, металл, пластмасса, мата, жүн секілді түрлі материалдардан жасалған сурет, графика, мүсіндер мен сәндік-қолданбалы өнер бұйымдары бала қиялының тым терең және шексіз екенін көрсетеді. Бұл көрмеде балалардың эстетикалық сезімін, көркемдік талғамын оятып, шығармашылық қиялын дамыту үрдісі белгілі жүйеде жинақталған. Шығармашылық жұмыстар арқылы әр аймақтан келген балалар құрдастарының тұрмысы мен өмір салтын, ұлттық және мәдени ерекшелігін түсінуге үйренеді. Талант екенін тай күнінен көрсетіп, бабы келіссе, бірегей шебер болып шығатынын бүгін дәлелдеп отырған балаларға арналған бұл көрме – баға жетпес қолдау. Әлі жас болса да, келешегінен үміт күттіретін талантты балалардың тырнақалды туындыларының ұлттың руханият ордасы болып отырған Мемлекеттік орталық музей секілді ірі мәдениет орталығына тұңғыш рет көпшілік назарына ұсынылуы «Балалар жылы» аясында ғана мүмкін болып отыр.
Музей басшылары, Т.Жүргенов атындағы Ұлттық өнер академиясының профессорлары, ұлттық бейнелеу өнерінің іргесін көтерген көрнекті қылқалам шебері Әбілхан Қастеевтің қыздары Гүлдария мен Гүлназия көрмеге қатысқан жас дарындардың шығармашылық ізденісін жоғары бағалап, үздік деп танылғандарға Алғысхаттар мен энциклопедиялық альбом-кітаптарды сыйға тартты.
АЛМАТЫ
