19-шы жазғы Гимназиада Францияда (Нормандия) биыл 14-22 мамыр аралығында өтеді. 20 спорт түрінен сайыстар 9 қалада өткізіледі: Кан, Довиль, Экув, Гранвиль, Гавр, Монтивилье, Пон-Одемер, Руан, Валь-де-Рей. 70 елден 3 500 оқушы бақ сынайды. Айта кетейік, Қазақстан бұл байқауға алғаш рет қатысады.
Қазақстан паралимпиадалық спорт түрлері мен брейк-данс / би спортынан басқа спорт түрлеріне қатысады. Қазақстандық делегацияны Білім және ғылым министрлігінің Ұлттық ғылыми-практикалық дене тәрбиесі орталығы бастап барады. Делегацияның құрамында 294 адам бар, қатысушылар саны бойынша ел құрамасы Франция мен Бразилиядан кейінгі 3-орында. Гимназиада бағдарламасы садақ ату, көркем гимнастика, жеңіл атлетика, бадминтон, 3х3 баскетбол, жағажай волейболы, бокс, би спорты / брейк-данс, семсерлесу, дзюдо, спорттық бағдарлау, ырғақты гимнастика, регби-7, жүзу, үстел теннисі, тхэквондо, күрес, паралимпиадалық: жеңіл атлетика, дзюдо, жүзу спортынан тұрады. Халықаралық жоба дүниежүзілік онлайн-платформаларда көрсетіледі.
Гимназиада өтетін Нормандия – Франциядағы ең танымал аумақтардың бірі. Бұл аймақ өзінің тарихымен, әртүрлі қалалардағы мәдени ескерткіштерімен, сонымен қатар спортқа деген айрықша көзқарасымен әйгілі. Халқының төрттен бір бөлігі 20 жасқа толмаған жасөспірімдер, яғни бұл өңір жастарға бағытталған. Әртүрлі спорт түрі бойынша 7 880 спорт клубында 730 мыңнан астам спортшысы бар Нормандия – ұлттық және халықаралық спорттық іс-шаралар жиі өткізілетін өте белсенді спорттық аймақ. Нормандияның ауылдық жерлері теңіз жағалауында орналасқан.
Бүкіл әлемнің жас спортшыларының қатысуымен өтетін ең беделді халықаралық мультиспорттық іс-шарада қазақстандық оқушылар еліміздің намысын қорғап, әлемнің түкпір-түкпірінен келген оқушылар арасынан достар табуға, әлемді саяхаттауға мүмкіндік алады. Ел үмітін арқалаған жас спортшыларға сәттілік серік болсын.
13 мамыр күні Халықаралық Н.Назарбаев әуежайында Білім және ғылым министрінің қатысуымен спортшыларды шығарып салу рәсімі өтеді.