Мемлекет басшысы «Жаңа Қазақстан» тұжырымдамасын ұсынды. «Адам – мемлекет үшін емес, мемлекет – адам үшін» ұғымы алға шығуға тиіс екенін айтты. Мемлекеттік қызмет сапалы, кедергісіз әрі уақтылы көрсетіліп, елдің мүддесі бірінші орында тұруға тиіс.
Түркістан облысына арнайы іссапармен келген Мемлекеттік қызмет істері агенттігінің төрағасы Дархан Жазықбаев облыс активімен, мемлекеттік қызметшілерімен кездесуде осылай деді. Сондай-ақ жиында агенттік төрағасы жүргізіліп жатқан реформаларды оңтайлы жүзеге асыруда агенттік алдында тұрған бірқатар мәселені баяндады. Көрсетілетін мемлекеттік қызметтердің басым көпшілігі өңірлерде ұсынылатынын ескере отырып, оларды тиімді әрі сапалы жүзеге асыру қажеттігін алға тартты. «Еліміздің кез келген азаматы мемлекеттік қызметтерді өзі қалаған өңірде немесе оларды ұсынатын мекемеде алу мүмкіндігіне ие болуға тиіс. Сондай-ақ мемлекеттік қызмет көрсету мерзімдерін сақтамау және рәсімдерін бұзу секілді мәселелердің алдын алу, мемлекеттік қызметті оңтайлы бағытта ұйымдастыру шараларын қолға алу қажет», дей келе агенттік төрағасы мемлекеттік қызметке іріктеуді жеңілдету бойынша жасалып жатқан бірқатар ұсынысқа тоқталды. «Жоғары оқу орындары мен колледждерде мемлекет есебінен білім алып, оқу үлгерімінің орташа балы жоғары көрсеткіштегі маман иесі атанған жастарды аудандық және ауылдық деңгейлердегі төменгі лауазымдық мемлекеттік қызметке конкурстық іріктеусіз қабылдау ұсынылып отыр. Бұл қадам жас мамандардың ел өңірлеріне оралып, оның дамуына үлес қосуына жол ашып, аймақтарда кадр тапшылығын азайтуға ықпал етеді деп ойлаймыз», деді ол.
Кездесу барысында өңірдің мемлекеттік қызметшілері бірқатар өзекті мәселені қозғап, ұсыныстарын жеткізді. Кейбір аудандарда мемлекеттік қызметші саны халық санына сай емес екені, олардың құқығын қорғау бағытындағы түйткілдер айтылды. Мемлекеттік қызметшілердің білімін, қоғаммен байланыс орнатудағы шеберлігін көтеру, елдің мәселесіне жедел үн қату жолдары талқыланды. Сонымен бірге агенттік төрағасына жаңа Түркістан облысын құру барысындағы алгоритм мен іс-шаралар баяндалды. Бұл орайда елімізде жаңа облыстарды қалыптастыруда Түркістан өңірінің тәжірибесі де назарға алынатын болды. Түркістан қаласында тұрғындарды қабылдап, өтініштерін тыңдаған агенттік төрағасы іссапар аясында Қожа Ахмет Ясауи атындағы Халықаралық қазақ-түрік университетінің оқытушы-профессорлар құрамымен және жас мемлекеттік қызметшілер мектебінің студенттерімен кездесті. Бүгінде облыстағы мемлекеттік қызметшілердің 500-дейі – осы оқу орнының түлектері екенін айта кетелік.
Ордабасы ауданы және Кентау қаласында азаматтарды жеке қабылдап, мемлекеттік қызмет көрсету сапасымен танысқан агенттік төрағасының іссапары Шымкент қаласында жалғасты. Мемлекеттік қызметшілермен кездесуде Дархан Жазықбаев Президент қойған бірқатар міндетке тоқталып, мемлекеттік қызмет көрсету бюрократиялық, формальді принциптерге емес, нақты нәтижеге бағдарлану керектігін айтты. «Мемлекеттік қызмет бюрократияға жол бермейтін, халықтың қажетіне бағдарланған сервистік сипатта ұйымдастырылған кезде қалыптасқан олқылықтар еңсеріліп, мемлекеттік аппараттың жұмысы жаңа деңгейге көтерілері анық. Жасалып жатқан реформалардың барлығы да ел игілігіне бағытталып отыр. Мемлекеттік қызметті түбегейлі жаңғыртудың да басты мақсаты – «халық үніне құлақ асатын» мемлекеттік аппарат қалыптастыру», деді Д.Жазықбаев. Сонымен қатар агенттік төрағасы жаңа редакциядағы Әдеп кодексінде көрсетілген ашықтық, әділдік, адалдық, сыпайылық, адал ниеттілік және клиентке бағдарлану қағидаларына баса назар аударуға шақырды. Мемлекеттік қызметші мемлекеттік органның өкілі ретінде оның абыройы мен беделіне нұқсан келтіретін әрекеттерге, сыбайлас жемқорлыққа, мүдделер қақтығысына, қоғам тарапынан, сонымен қатар әлеуметтік желілерде сынға ұшырайтын әрекеттерге жол бермеуге тиіс екендігін атап өтті. Ал Шымкент қаласының әкімі Мұрат Әйтенов «Халық үніне құлақ асатын мемлекет» қағидасына сәйкес қалада «адамдар – әкімге» форматынан «әкім – халыққа» қағидатына көшу бағытында жүйелі жұмыстар атқарылып жатқанын атап өтті. «Мемлекет басшысының тапсырмасына сәйкес 2022 жылдың 1-тоқсанында қалада 72 кездесу өткізіліп, онда 374 маңызды мәселе көтерілді. Кездесулерде көтерілген мәселелердің 78-і қанағаттандырылды, 249-ы жыл соңына дейін шешімін табады, ал 48 мәселені шешу ұзақ мерзімді қажет етеді», деді қала әкімі.
Іссапар барысында Дархан Жазықбаев Ten qogam әлеуметтік қолдау орталығында мүмкіндігі шектеулі азаматтарға «бір терезе» қағидасы бойынша ұсынылатын мемлекеттік қызметтің сапасымен, «I-shymkent 109», «Диспетчерлік қызмет» және Халыққа қызмет көрсету орталықтарының жұмысымен танысты. «Жастар ресурстық орталығында» өткен еркін форматтағы пікір алмасу кезінде жастардың толғандырған сұрағына жауап беріп, оларды талапшыл, еңбекқор әрі адал болуға, үздіксіз білім алуға шақырды.