![Бестөбеден бас тартпақ](/media/2022/04/27/crop-6_10_891x1336_about-gold-img1.jpg)
Бұл қаржы жаңа кен байыту фабрикасының құрылысына жұмсалған. Фабрика негізінен өндіріс кезінде жинақталған қалдықтарды өңдейді. Сондай-ақ болашақта өндірілген кенді өңдеуге тиіс.
Дияр Қанашевтің пікіріне қарағанда, компания жағдайды реттеудің екі сценариін әзірлепті. Оптимистік сценарий бойынша, жоба геологиялық барлау жүргізіліп, қорлар нақтыланғаннан кейін 2024 жылы пайдалану фазасына шығарылады. Пессимистік тұрғыдан алғанда компания Бестөбе кеніші мен байыту фабрикасын консервациялайды, содан кейін жояды.
– Сценарийді таңдау ұсынылып отырған кен орнын карьерлік әдіспен игеру жобасына деген қоғамның реакциясына байланысты. Осы жылдың 18 наурызында кен орнының кеншілері Президент Қасым-Жомарт Тоқаевты кеніштегі шахта өндірісінің жабылуына жол бермеуге шақырып, үндеу жариялады. Өндіріс тоқтаса, мыңнан астам адам жұмыссыз қалады. Олардың қайда баратыны да белгісіз, – дейді Д.Қанашев.
Еске сала кетейік, былтыр шілдеде компания жергілікті тұрғындардың наразылығына байланысты Бестөбедегі фабриканың қызметін тоқтатуға мәжбүр болды. 2021 жылы «Алтыналмас» кәсіпорындары 11,9 тонна Доре қорытпасын өндірді. Биылға арналған өндірістік жоспар түрлі факторларға байланысты өзгеріпті. Соның өзінде жыл соңына дейін 15 тонна өнім алу жоспарланып отыр.
– Болжамдық сценарийден ауытқыған себебіміз, Ресейге қарсы санкцияларға байланысты логистикалық проблемалар орын алуы мүмкін. Компоненттер мен материалдарды жеткізу жүйелері құлдырауда. Ресейдегі біз жұмыс істеген жабдықтарды жеткізушілердің өкілдіктері жабылды. Siemens, Schneider Electric, ABB сияқты электр жабдықтарын жеткізушілер бізбен Мәскеудің дистрибьюторлық орталықтары арқылы жұмыс істеді. Бір түнде аталған компаниялардың енді біздің аймаққа жұмыс істемейтіні туралы хат алдық. Бәрі кенеттен болды. Сондықтан ешкім В жоспарын ойластырмаған. Қазір логистиканың әртүрлі нұсқаларын, соның ішінде Қытай арқылы тасымалдау жағын қарастырып жатырмыз, – дейді Д.Қанашев.
«Алтыналмас» отандық алтын өндірушілердің ТОП-3 қатарына кіреді. Компанияның өндіруші кәсіпорындары Жамбыл, Қарағанды және Ақмола облыстарында орналасқан. Сондай-ақ Шығыс Қазақстан облысында барлау жобасы бар. Компанияның қаржылық нәтижелері туралы ең соңғы ақпаратқа сүйенсек, 2021 жылдың 9 айында түсім 21 пайызға – 118,9 млрд теңгеге дейін, таза пайда 102 пайызға – 87,2 млрд теңгеге дейін өскен.
Бестөбе жобасы «Қазақалтынды» сатып алғаннан кейін «Алтыналмасқа» ауысқан болатын. Бұл ретте ортақ мәмілеге келу үшін үш жыл (2019-2021 жылдар) уақыт қажет болғаны есімізде. «Қазақалтынның» бұрынғы иелері – Владимир Ким мен Эдуард Огай компанияның 100 пайыздық акциясы үшін шамамен 310 млн доллар алды. 2022 жылғы 1 сәуірдегі жағдай бойынша, компанияның акционерлері келесідей үлеске ие: GOLDEN RESERVES B.V. – жай акциялардың 60 пайызы, Владимир Жұманбаев – 22 пайыз, Дияр Қанашев – 9,5 пайыз, Игорь Ветиул – 5,5 пайыз.