Тау-тасты еркін кезіп жүрген түз тағыларын санау бір-екі күндік жұмыс емес. Аптаға, айға созылады. «Катонқарағай» ұлттық паркінде санақ жұмыстарына 248 инспектор мен жануарларды қорғау және өндіру бөлімінің 5 маманы қатысты. Санақ жұмыстары кезінде қорықшылар жабайы аңдар шоғырланған жерлерде іздерін санады, көзге түссе, өздерін санады. Фототұзаққа түскендері және бар.
Жануарларды қорғау және өндіру бөлімінің бастығы Ерік Қасымовтың айтуынша, тұяқты аңдардан таутеке, марал, елік, қабан шошқа, күдір, бұланның сандары тұрақты. Сонымен қатар терісі бағалы бұлғын, түлкі, су күзені секілді аңдар да кеміп, болмаса көбейген жоқ. Жыртқыштардың саны да тұрақты.
– Санақ жұмыстарына инспекторлар кәдімгідей дайындалады. Аң-құстардың ізімен тау кезу қиынның қиыны. Жеткен жерімізге дейін автокөлікпен, одан әрі атпен жүреміз. Ат тұяғы баспайтын жерлерге жаяу шығуға мәжбүрміз. Жабайы аңдар жүретін жерлерге фототұзақ құрамыз. Жабайы аң-құстар шоғырланған жерлер дронмен де бақыланды, – дейді Е.Қасымов.
Естеріңізде болса, «Катонқарағай» ұлттық табиғи паркінің аумағына құрылған фототұзаққа «Қызыл кітапқа» енген қар барысы, Алтай ұлары түскен еді. Мамандардың пікірінше, жабайы аң-құстар санының тұрақты болуы – жаз, күз айларында дайындалған азық пен науаға себілген тұздың нәтижесі. Алтайды мекен ететін аң-құстардың түріне келер болсақ, ұлттық табиғи парк аумағында қосмекенділердің 3 түрі, бауырымен жорғалаушылардын 6, сүйекті балықтардың 17, сүтқоректілердің 67, құстардың 280-нен астам түрі бар. Ал омыртқасыз жануарлардың 1 500 түрі мекендейді екен. Қазақстанның «Қызыл кітабына» енген сүтқоректілердің 5 түрін (Алтай арқары, тас сусары, қар барысы, сабаншы және Иконников жарқанаты), құстардын 21 түрін (бүркіт, ителгі, алтай ұлары, сұр тырна, қара дегелек, балықшы тұйғын) парк аумағынан кездестіруге болады.
