Ауылдың арғы шетінде ертеде қарттар өз қолдарымен салған шатыры жоқ, төбесі балшықпен сыланған үйлер көп болатын, ел ішінде «Пермовой» немесе «Шалдар жақ» деп аталып кеткен осы үйлерді соғысқа қатысқан қарттар мекен етті. Сырт көзге кішкентай ғана жатаған үй болып көрінгенмен, іші сыр мен шежіреге толы сол үйлердің біріне поштада жұмыс істейтін Нәбәт апай мен інісі Жақан көшіп келді. Жақанның азан шақырып қойған аты Жәңгірхан екен, бала кезінде еркелетіп Жақанжан аталып кетіпті.
Ауыл шеберханасындағы Құрмет солардың үлкен ағалары еді, темірден түйін түйген елге белгілі мықты ұста болатын. Сол кезде үлкендерден Құрметтің әкесі Ақымғали өте шебер ұста болды дегенді жиі еститінбіз. Ауылдағы кеңшар тарап, әркім өз алдына тіршіліктің қамына кірісіп, күнелте бастады, сол кезде Жақан қала мен ауыл ортасына жеке көлігімен ауыл тұрғындарын тасып, такси қызметін атқарды.
Бірде ауылға сәлемдеме беріп жіберудің қамымен қаладағы базар маңына келдім. Алдымнан Жақан ағай кездесті, аман-саулықтан кейін ауылдың жағдайын сұрап, біраз әңгіме-дүкен құрдық. Көлігіне жолаушылар толған соң, жолға шығар алдында: «Рафхатжан, менің әкем соғыстан аман келді ғой, елге оралған соң ұста болды. Бізді өмірге әкелді «Мәңгілік алауда» Отан үшін от кешкендердің, үйлеріне оралмағандардың тізімінде әкем Ақымғали Қойлыбаевтың есімі де жазулы тұр. Інім, саған өтініш, әкем туралы мақала жазшы», деді. Осылайша ауыл мен қала арасына қатынап жүрген Жақан бірде ауа райының қолайсыз кезіне тап болып, мезгілсіз қазаға ұшырады.
Ендігі сөзді ауылдағы байланыс бөлімінде жұмыс істеп, сол жерден зейнетке шықан Нәбәт апайдың өзіне берейік:
«Әкеміз Ақымғали 1909 жылы Сулыкөл ауылында қарапайым шаруа отбасында дүниеге келген. Қойлыбай, Жолдыбай деген екі ағайынды болса, Жолдыбайдың жалғыз қызы Шамшырақ апамыз Сәуле ауылының жігіті, емші, сынықшы Темірғали Теловке тұрмысқа шықан. Олардың жалғыз ұлы Қалдығайты өзеніне суға кетіп, қаза болған екен. Қойлыбайдан туған жалғыз ұл Ақымғали әке-шешеден тоғыз жасында жетім қалып, ауқатты Әбу деген қарттың қолында өсіпті.
1942 жылғы ақпан айының 8-і күні әскерге шақырылып, жол салу батальонының көпір жөндеу взводында ағаш шебері болады. Жау ұшақтары салынған көпірлерді бомбылап, қиратып жатса да күндіз керек ағаштарын кесіп, дайындап, жасырып отырады екен. Ал көпірді көбіне түнде салатын көрінеді. Неміс ұшақтарының кезекті бомбылауында жарақат алып, тұтқынға түседі. Бір қызығы, тұтқында ауылдастары Назарәлі мен Дабыш та бірге болыпты. Оңтайлы сәті келгенде қасындағы ауылдас інішектерімен бірге және тағы үш-төрт жігіт қосылып қашып шығып, тұтқыннан аман-есен құтылады. Ал соғысты Берлинде аяқтайды. 1946 жылғы 24 қыркүйекте Жоғарғы Бас қолбасшының бұйрығымен әскерден босап, елге кеудесіндегі наградалары жарқырап оралады.
Әкеміз елге оралған соң, Олжай Бердештің қызы Қазизаға үйленіп, төрт ұл мен бес қызды дүниеге әкеледі. Тұңғышы Себеп 1949 жылғы, қолынан балғасы түспей, әкесімен көрік қыздыруға күнде бірге барады екен. Келген соң балғасын жастығының астына салып жататын болыпты. Осы қылықтарына ауылдастары таң қалып жүреді екен, содан көз тиіп, төрт жасында қайтыс болады.
Сәтима есімді кішкентайы да көзігіпті. Әкеміз бен анамыз балшық басып, саман илеп, 1956 жылы үй салады. Сол кезде ауылда небәрі алты үй ғана болыпты. Алдымен Қажым, Қыздарбек, Беркін, Еркіштай, Нұртаза, Тасқали өз күштерімен үй салып қоныстанған екен», деп қайырды әңгімесін Нәбәт апай.
Оның сөзін ауылдың ақсақалы, сексеннің сеңгіріне шыққан Еламан Есешов төмендегіше жалғастырды. «Бір топ бала 3-4 шақырым жердегі Шөмішкөлден жаяу келіп оқимыз. Қыстың күні мектепке әуелі Ақымғали ағайдың үйіне соғып шәй ішіп, жылынып алған соң барамыз. Өзі бала жатырқамайтын әзілқой жан еді, бізбен қалжыңдасып отыратын. Содан да болар, үйінде өз балаларынан бөлек жиырманың үстінде бала жатады. Көмір салып, көрік қыздырып, оны үрлеп, өгізге шана, арбаға дөңгелек жасайтын. Ауыл- ауылдан адамдар келіп, кезек күтіп тұрушы еді».
Сулыкөл ауылдық округінде біраз жыл ауыл әкімі болып зейнетке шыққан Бітімәлі Құрманалиев ақсақал сол кезді былай деп еске алады: «10-12 жас шамасындағы баламыз. «Сталин жолы» колхозының шетінде Ақымғали атамыздың ұстаханасы болды, біздер көрік қыздырғанын, оны үрлегенін қызықтап барамыз. Ағашы кеуіп, темірі түсіп қалған қаусаған дөңгелектерді қайтадан жаңартып беруші еді. Дәнекерлейтін аппарат жоқ болса да темірдің жалғанған жерін білдірмей, жап-жаңа дүние жасап шығаратын. Қысқасы, қолынан бал тамған шебер ұста кісі еді».
«Әкеміз Ақымғали Қойлыбаев соғыс салған жара салдарынан 1967 жылғы 7 қарашада өмірден озды, ол кезде ағамыз Құрметқали – 14 жаста, ең кенже сіңлім Алтынзер екі жаста болатын. Құрмет әке жолын қуып, совхозда темір ұстасы болды, мен Алматыдағы байланыс техникумын бітіріп, Қалдығайты поштасында 40 жылдан астам еңбек еттім. Садап Бөрлідегі техникуды бітірді, Самиға Алматы мәдени-ағарту училищесін аяқтаса, Шыңғыс Шымкенттің милиция мектебінде оқып келіп, Қаратөбе аудандық ішкі істер бөлімінде мойор шеніне дейін қызмет етті, сол жерден зейнетке шықты. Кенжеміз Алтынзер Куйбышев байланыс техникумын бітірген, біраз жыл Ресейде тұрып, кейін елге оралды. Ал анамыз Қазиза Бердешқызы 1976 жылы ақпан айының 28-і күні өмірден өтті», деді әңгімесінің соңында Нәбәт апамыз.
Бұл естелік-әңгіме, өздеріңіз байқағандай, Жақанның аманатын орындау мақсатында ауыл тұрғындары мен қызы Нәбәттің айтқандары және Қазақстан Журналистер одағының мүшесі, белгілі қаламгер Қайыржан Хасановтың 2013 жылы жарық көрген «Отан үшін от кешкен қаратөбеліктер» атты кітабы негізінде жазылды. Бұл кітапта да жоғарыда айтылған Нәбәт апайдың әңгімесі желісімен кейіпкеріміздің өмір жолдары туралы мәліметтер берілген екен.
Рафхат ХАЛЕЛОВ,
Қазақстан Журналистер
одағының мүшесі
ОРАЛ