Ресейдің Барнаул қаласында өнер академиясында оқығанмын. Содан бері шығармашылықпен айналысып келемін. Ән салып қана қоймаймын, орыстың ән өнерін де зерттеймін. Колледж қабырғасында жүргенде-ақ «Бастеньки» фольклор ансамблінде өнер көрсеттім. Кейін «Родничок» балалар ансамблінде жетекші болдым. Кішкентай балдырғандарым республикалық, халықаралық байқауларда топ жарды.
Әлі де ән өнерінен қол үзбейміз. Айтайын дегенім, көңіліміз тоқ, уайымымыз жоқ болып, әндетіп, би билеп жүре бергенімізге не жетсін?! Көпұлтты еліміз бір шаңырақ астында тату-тәтті ғұмыр кешіп жатырмыз. Әр ұлттың өнерін, салт-дәстүрін, тілін, ділін сыйлаймыз.
Алғаш Қазақстанда Достық үйі бізде, Өскеменде ашылғаны есімізде. Сонда салтанатты іс-шараға да өзіміз де қатыстық. Сол кезде-ақ еліміздің бірлігі, біртұтастығы сезілген еді. Әр бірлестік мүшелерімен туысқандай болып араласып кеттік. Қаншама іс-шара өткіздік?! Қазіргі таңда Достық үйі кеңейіп, қанатын кеңге сермеді. Қоғамдық жұмыстарға жастар да тартылып жатыр. Осының бәрі бізді қуантады. Ұлттардың айрандай ұйып отырғандарына қарап қуанамыз. Осынау бірлігімізден, татулығымыздан айырылмайық. Кешегі елімізді есеңгіретіп кеткен кеселден сақтасын! Түрлі қақтығыстардан аулақ болайық! Еліміз мәңгі жасасын!
Анна Дёмина,
Орыс мәдени бірлестігінің белсендісі