«Жаңа Қазақстан» идеясына қолдау білдірді

Саяси кеңестің кеңейтілген отырысында Мемлекет басшысы Қасым-Жомарт Тоқаевтың «Жаңа Қазақстан: Жаңару мен жаң­­ғыру жолы» атты халыққа арна­ған Жолдауындағы саяси реформалар легі негізгі тақырыпқа айналды. Сондай-ақ басқосуда партияның жаңа бастамалары зерделенді. Жиынға қатысушылар Президенттің конституциялық өзгерістер жөніндегі және өзге де ел дамуына қатысты реформаларын толық қолдайтындарын жеткізді.

Партия Саяси кеңесінің мүше­лері «Жаңа Қазақстан» идеясы еліміз­дегі ең өзекті мәселелерді назардан тыс қал­дыр­мауға бағыт­талғанына, демократиялық үдеріс­терді дамытуға жағдай туғыза­тынына бек сенімді. Сондай-ақ партия мүшелері Мемлекет басшы­сының бастамасымен қолға алынып жат­қан саяси өзгерістер «Ауыл» партиясының саяси ортада бәсекелестікке қабілет­тілігін арттырып, жаңа деңгейге көтері­луіне мүмкіндік туғызады деген пікірде. Басқосуда Саяси кеңес тарапынан партия­ны жаңғырту жөніндегі бірнеше ұсыныс­тың қолдау табуы да сол оймен сабақтасып жатса керек.

«Ауыл» партиясының жетек­шілері бірінші кезекте сайлау комиссияларының құрамынан өз ісіне берілген партия мүше­лерін көргісі келеді. Сонымен қатар, партия басшылығы саны бар, сапасы жоқ мүшелерін ұйым құра­мынан шығарып, олардың ор­нын қоғамдық мәселелерге бей­жай қарамайтын, өзіндік ұста­нымы бар азаматтармен толықтыруға ниеттеніп отыр.

Сонымен қатар, «Ауыл» партиясынан сайланған депутаттар мен әкімдердің қызметін баға­лаудың цифрлық платформасын құру маңыздылығы айтылды. Цифрлық платформа әрбір депутат пен әкімнің қызметі партия мүшелері мен сайлаушылар алдында есеп беретіндей етіп құрылады. Бұл цифрлық платфор­ма «Ауыл рейтинг» деген атаумен 2022 жылдың 1 шілдесінен бастап тестілік режімде іске қосылмақ.

«Өткен жылы партиялық тізім бойын­ша түрлі деңгейдегі мәслихаттар мен Мәжіліс сайлауы өтті. Бұл біз үшін жаңа тәжірибе болды. Әрине, депу­тат­тыққа кандидаттарды сапалы іріктеуге уақыт аз болғанын мо­йындау керек. Осыған орай үміткерлерді іріктеу үшін тағы бір цифрлық платформа – «Ауыл азаматы» платформасын құруды ұсынамын. Оның көмегімен кез келген қазақстандық өзін танытып, еңбегі мен әлеуетін көрсете ала­ды, сондай-ақ алда­ғы сайлау нау­қанында өзін пар­тиялық резерв­ке кандидат ретін­де ұсына алады», деді партия төрағасы Әли Бектаев.

Жиын барысында ауыл ша­руашылығы саласын дамытуға қатысты мәселелер, атап айтқан­да, ауыл шаруашылығы сала­сын қолдауға арналған субсидия­лар­дың аздығы, шаруаларды мемле­кеттік қолдау тетіктерінің жетіл­дірілмегендігі сөз болды. Партия ұзақ жылдар бойы Агробанк құру мәселесін көтеріп келеді. Осы орайда партияның Саяси кеңесі Премьер-Министрдің атына агро­өнеркәсіптік кешен­ді қолдауға бе­рілетін субсидиялар көле­мін екі есеге ұлғайту және шағын және орта шаруашылықтарға бөлі­нетін несие­лер­дің жылдық үсте­месін 1-2%-дан асыр­мау туралы ұсыныстармен ашық хат жол­дамақ.

Саяси кеңестің кеңейтілген отырысында «Жаңа Қазақ­стан­дағы жаңа ауыл» жобасын іске асырудың маңызы сөз болды. Бұл жобада «Ауыл» партиясынан сайланған мәслихат депутаттары мен партия демеушілері тарапынан халыққа материалдық көмек көрсету, әлеуметтік жобаларды іске асыру, ауылды көріктендіру сияқты іс-шаралар кешенін жүзеге асыру жоспарланбақ.

Басқосу соңында «Жаңа Қазақ­­стан» тұжырымдамасына негіз болатын қо­ғам­дық құнды­лық­тарды қалыптастыру бо­йын­ша «Ауыл» партиясының үндеуін пар­тия хатшысы Анас Баққожаев таныс­тырды.