Аймақтар • 05 Мамыр, 2022

Кері байланыс көпшілік көңілінен шықпай тұр

59 рет көрсетілді

Көпшілік тарапынан көтерілген күрделі мәселеге дер кезінде жауап беру – уақыт талабы. Бұл ретте әлеумет пен әкімдердің тығыз байланыста болуы да өте маңызды. Мемлекет басшысы Қасым-Жомарт Тоқаев «Халық үніне құлақ асатын мемлекет» тұжырымдамасында жергілікті биліктің басшыларына бұқарамен бірлесе жұмыс атқаруды тапсырған болатын. Президенттің бұл тапсырмасы өңірлердегі талай түйткілді мәселенің оң шешілуіне ықпал етіп келеді. Түрлі деңгейдегі әкімдер де көпшілікпен кездесулерінде барлық сала бойынша тиісті жұмыстардың атқарылып жатқанын айтады. Әрине, әр өңірде жүйелі жұмыс баршылық. Дегенмен күрделі мәселе де көп. Оның бәрі де оң шешілуде деп айту қиын. Кері байланыс көптің көңілінен шықпай келе жатқан аймақтар да бар.

Кері байланыс мәселесі жер­гілікті шенеуніктерге де байланысты. Өкінішке қарай, көп басшылар жалтарма жауаппен ғана шектеледі. Мұның аяғы жалған уәде беруге алып барады. Бүгінде Жамбыл облысында да кері бай­ланыс көңіл көншітпей тұр. Мәселен, осы күнге дейін Шу, Меркі, Мойынқұм аудандарында халықтан түскен сауалға мүлде жауап берілмеген. Бұл ретте облыс әкімінің баспасөз хатшысы Данияр Асқарұлы өз деңгейінде жауап берілмегендіктен немесе сапасыз жауап берілгендіктен, қарапайым мәселенің өзін әлеу­меттік желі қолданушылары облыс әкімін белгілеп, респуб­ликалық деңгейде көтеріп жататынын айтады. «Тағы да айта кететін мәселе, өңірдің баспасөз қызметіне республикалық және облыстық бұқаралық ақпарат құрал­дарының өкілдерінен көп­теген сауал-хаттар түсіп отырады. Бұл хаттар негізінен облыс әкі­мінің атына түседі және оған да әкімнің атынан жауап бе­ріледі. Осы ретте жауап беруде бір­қатар кедергі туындап жатады. Аудандар мен басқармалардағы тиісті мамандардан сапалы және уақтылы жауап алу қиынға соға­ды», дейді Данияр Асқарұлы. Мұндай жағдайды тілшілік тір­лігімізде басымыздан біз де өткер­генбіз. Қазір жұмыс істеудің тиімді тәсілі көп. Мәселен, Жуалы ауданындағы «Қаралма» тау-шаңғы базасының құрылысы мен қаржысына қатысты мәселе біраз уақыттан бері көтеріліп келеді. Алайда жауапты мекемелер мұның жауабын бір-біріне сілтеп отыр. «Тараз» ӘКК» АҚ толық жа­уа­п бере алмайтынын айтса, туризм, құрылыс және кәсіп­керлік сияқ­ты үш үлкен бас­қарма да аталған нысанның құрылысы мен қаржысы өздеріне қатысты емес екенін айтуда. Сонда мұның жауабын аталған мекемелер, оның басшылары білмегенде кім біледі деген ой келеді. Әрине, өңірдегі мәселе жалғыз бұл емес. Бүгінде жауабы берілмей жатқан талай сауалды айтуға болады.

Қарапайым тұрғындар түрлі мәселені басылым бетінде және әлеуметтік желіде ғана емес, бү­гінде «Jambyl 109» қызметіне қоңырау шалу арқылы да жеткізе алады. Бүгінге дейін мұнда да көптеген өтініш түскен. Алайда кері байланыстың нашар­лы­ғы бұл жерден де анық кө­рі­не­ді. «Жамбыл облысы бірың­ғай диспетчерлік қызметі» меке­месінің басшысы Бақкелді Тұр­сынбектің айтуынша, биыл 18-25 сәуір аралығында 895 тұр­ғыннан Call-байланыс орталығы, Instagram, WhatsApp, Telegram және Facebook арқылы өтініштер түскен. Өтініштер тиісті атқару­шы және жауапты мекемелерге жолданған. Оның ішінде 318 жағдай, 17 арыз, 12 ұсыныс және 5 алғыс, 539 кеңес берілген. Мәселен, түскен өтініштердің ішінде 6 өтініш мерзімінен кешік­­тіріліп жабылған. Оның ішін­де облыстық ветеринария бас­қармасы, Тараз қалалық тұр­ғын-үй және коммуналдық шаруа­шылық бөлімі мен «Жасыл Ел-Тараз» сияқты мекемелер бар. Ал қалған 12 мәселенің мерзімі ұзартылса, 12-сіне мүлдем жауап берілмеген. «Мысалы, об­лыстық денсаулық сақтау бас­қармасы тара­пынан ағымдағы жылы 94 өтініш тіркелген. Оның 70-іне мер­зімді жауап ұсы­нылған. Ал 12-сіне мерзімінен ке­шіктіріліп жауап берілген. Соң­ғы уақытта тұрғындар тара­пынан «109 қызметіне» тера­певтің қа­былдауына жазылу бойын­ша көп өтініш түскен. Аталған мә­селені шешуде «Damumed» ЖШС-мен интеграция­лау жұмыстары жүргізілді. Нәти­жесінде, биыл 1 мамырдан бастап қала тұрғындарын отбасылық дәрігердің қабылдауы «109 қыз­меті» арқылы іске асырылады. Сонымен қатар емханаларда дәрігерлердің жұмыс кестесіне байланысты да тұрғындардың шағымдары көбеюде», дейді Бақкелді Тұрсынбек.

Бұл ретте облыстық денсаулық сақтау басқармасының басшысы Әсет Қалиев кері байланыс жұ­мыстарында кемшіліктің бар еке­нін мойындайтынын, мұның бәрі тікелей ұйымдастырушының кінәсі екенін жеткізді. Яғни бір өңірдің бас дәрігерінің сылтауы – кері байланыспен жұмыс істейтін адам демалысқа кеткен. Орнына уақытша адам ал­ма­ған. Яғни бұл міндетті басшы еш­кімге жүктемеген. Сол сияқты, кері байланыс бойынша сын облыстық кәсіпкерлік, ин­дус­триалды-инновациялық да­мыту бас­қармасына да айтылуда. Аталған бас­қарма басшысы Аспандияр Сей­себаев болса, өзіне мәселе көте­ріп ешкімнің хабарласпағанын айтады.

Сондай-ақ облыстық поли­ция департаментіне биыл I-тоқ­сан­да 22 өтініш тіркелген. Атап айт­қанда, жол белгілерін қою мен алып тас­тау, заңсыз ор­на­тыл­ған қаладағы жасанды жол ке­дер­гілерін алу және заң­сыз тас­талған күл-қоқыс­тар­ға айып­пұл салу мәселесі тұр­ғын­дарды жиі толғандырады. Бір­ақ кө­те­ріл­­ген бұл сұрақтар­дың бірде-бірі ше­шімін таппаған.

Шыны керек, бүгінде кері байланыс дегенде, көптің көзіне әуелі әлеуметтік желі елес­тейді. Мәселен, белгілі бір бұқа­ралық ақпарат құра­лының бетін­де кәсіби журналист мәсе­ле көтереді. Ал сондай келесі мәселені түрлі әлеу­меттік желі­де кез келген адам жаза алады. Заман ағымына қарай бұл қол­же­тімді. Әрі бұған тосқауыл қою да мүм­кін емес. Бірақ облыстағы көп­теген мекеме басылым бетін­де кө­те­рілген мәселе бойынша жауап беруге салғырт. Бірді-екілі жағдай болмаса, бұл мәселе кенже қалуда. Жалпы, кері байланыс көпшіліктің көңілінен шықпай тұр.

Соңғы жаңалықтар

Тағы 1650 қазақстандық індет жұқтырды

Коронавирус • Бүгін, 09:00

Софиядан олжалы оралды

Спорт • Бүгін, 08:40

Жас теннисшілер жарады

Теннис • Бүгін, 08:32

Тұтынушы құқығын қорғайды

Қазақстан • Бүгін, 08:27

Ұқсас жаңалықтар