Қоғам • 09 Мамыр, 2022

Алтай Көлгінов ҰОС ардагерлерін жеңіс күнімен құттықтады

Елорда әкімі Алтай Көлгінов Ұлы Отан соғысы ардагерлерін Жеңістің 77 жылдығымен құттықтады, деп хабарлайды Egemen.kz Нұр-Сұлтан әкімдігінің ресми сайтына сілтеме жасап.

Egemen Qazaqstan

«Жеңіс күні мерекесі құтты болсын!

Бұл мерекенің тарихымыздан алар орны ерекше. Батыр бабаларымыздың жанқиярлығы мен ерлігінің арқасында елімізде бейбітшілік пен тыныштық салтанат құрды.

Ардагерлерімізді Ұлы Жеңістің 77 жылдық мерекесімен құттықтадым. Василий Антонович биыл 96 жасқа келеді. Соғыс уақытында Минск, Варшава, Познань секілді өзге де қалаларды жау қолынан азат етті. Соғыстан кейін теміржол станциясында еңбек етті. Өзінің кәсібилігінің арқасында басшылық қызметтерді де атқарды және теміржол көлігінің дамуына өлшеусіз үлес қосты.

Ырзағұл Байкешев биыл 99 жасқа толады. Ғасыр жасаған қария соғыс заманында Польша, Венгрия, Румыния елдерін басқыншылардан босатты. Соғыстан кейін Ақмола облысындағы ауылдардың бірінде экспедитор болып қызмет етті.

Михаил Васильевич соғыстан кейін темір жол саласында жұмыс істеді, сол сияқты қаланың маңызды нысандарының құрылысына атсалысты: Целинников сарайы, бірінші стадион, ЖЭО, әуежай және т.б.

Ұлы Отан соғысының әрбір ардагерінің, қатысушысының қайғы мен мұңға да, қуанышқа да толы естеліктері бар. Олардың ауыр, «соқтықпалы, соқпасыз» өмір жолы кейінгі ұрпаққа қашанда үлгі болып қалмақ. Батырларымызға қамқорлық көрсету, ерліктерін, есімдерін ұлықтап, құрмет көрсету – бүгінгі біздің басты парызымыз.

Бүгін елордамызда ескерткіштерге гүл шоқтарын қою рәсімі өтіп жатыр. Қорғаныс министрі Руслан Жақсылықовпен бірге батырларымызды еске алдық.

Ардагерлер мен тыл еңбеккерлеріне ұзақ ғұмыр, мықты денсаулық тілеймін! Жеңістің 77 жылдық мерекесі құтты болсын!», деп әкім өзінің Instagram парақшасында жазды.

Аяна Тоғанбек

Күннің маңызды және өзекті жаңалықтарын «Егемен Қазақстан» телеграм каналынан оқыңыз