Қоғам • 16 Мамыр, 2022

Киногерлер ағаш отырғызды

Топырақтың құнарын арттырып, ауаны тазартатын, жазда сая, қыста қамсау болатын көкжелектің қасиеті көктемнен бастап білінеді. Көктемдегі игі дәстүр, қайырлы істің бірі – тал егіп, ағаш отырғызу. Бұрыннан да көрікті жерді көгалдандыра түсіру мақсатымен жақында «Қазақфильм» киностудиясының аумағына еліміздің белгілі киногерлері ағаш отырғызып, сауапты іс жасады.

Айгүл АХАНБАЙҚЫЗЫ

Іс-шараның ашылу салтанатында Ш.Айманов атындағы «Қазақфильм» АҚ президенті Ақан Сатаев, «Ұлттық киноны қолдау мемлекеттік орталығы» КеАҚ төрағасы Есетжан Қосыбаев және қазақ киносының ардагері, киностудияның көркемдік жетекшісі Асанәлі Әшімов сөз сөйледі. Өз сөзінде Ақан Сатаев қазақстандық киногерлерді біріктіруге бағытталған бұл шара міндетті түрде жалғасын табатынын айтты. Ал Есетжан Қосыбаев киностудия басшылығына алғысын білдіріп, қазақ киносының өркен жая түсуіне тілектестігін білдірді.

Қазақ кинематографиясының дамуына өз үлесін қосып келе жатқан режиссерлер Дәрежан Өмірбаев, Рүстем Әбдірашев, Рашид Нұғыманов, Серік Апырымов, Әділхан Ержанов, Фархат Шарипов, Ернар Нұрғалиев, Эля Гильман, Серікбол Өтепбергенов, Қанат Бейсекеев, актерлер Меруерт Өтекешева, Ерболат Тоғызақов, Байкенже Белбаев, Альмира Тұрсын, Шыңғыс Капин, Азамат Сатыбалды, Әсел Сағатова, Қарлығаш Мұхамеджанова, Төлепберген Байсақалов, Жан Байжанбаев, Айдос Бектеміров, Әнуар Нұрпейісов, Асқар Ілиясов және өзге де жас әртістер студия аумағына 80 түп ағаш отырғызды. Кино майталмандары желмен діріл қаққан жас шыбықтардың күні ертең жапырағы жайқалған діңі қатты, бұтағы мол, биік бәйтеректерге айналатынына сенім білдіріп, тоғайған көңілмен тарқасты.

АЛМАТЫ

Күннің маңызды және өзекті жаңалықтарын «Егемен Қазақстан» телеграм каналынан оқыңыз