Қоғам • 18 Мамыр, 2022

Әлеуметтік қорғау ма, әлде қорлау ма?

251 рет көрсетілді

Жақында Сыбайлас жемқорлыққа қарсы іс-қимыл агенттігі кейінгі кезде «қара алтынымен» ғана емес, бірінен соң бірі тура жолдан тайып тұтылып жатқан басшы қызметкерлерімен де аты шығып тұрған Атырау облысында тағы екі шенеунікке жүйелі түрде пара алды деген айып тағылып, тергеуге алынғанын хабарлады.

Бұл қылмыстық істің ерекше назар аударарлығы – оның мүмкіндігі шектеулі жандарға қатысты екенінде. Антикордың мәліметіне қарағанда, Еңбек және ха­лық­ты әлеуметтік қорғау министрлігі Еңбек, әлеуметтік қорғау және көші-қон коми­тетінің Атырау облысы бойынша депар­та­ментінің басшысы мен бөлім басшысы мүгедектікті кедергісіз ұзартып беру үшін 30-70 мың теңге аралығында пара алып келген көрінеді. Мұндай «ақылы қызмет» онсыз да мемлекеттен алатын жәр­демақысын шайлығына әрең жеткізіп жүрген кембағал адамдардың ашу-ызасын туғызып, жанайқайлары ақыры Анти­кор­дың да құлағына шалынғаны анық.

Пайымдап қарасақ, мүгедектігі бар мүсәпір жандардан пара дәмету үшін қаншалықты арсыз, имансыз, қатыгез, құлқынның құлы болу керек десеңізші?!

«Естімеген елде көп» демекші, бұдан бірер жыл бұрын еліміздің батыс аймағындағы басқа бір облыс орталығында болып, жергілікті әлеуметтік қызметкерлермен кездескенімізде олар сөз арасында бізге сырт көзге сап-сау көрінетін, әрі автокөліктің анау-мынауын емес, аса қымбат тұратын «Джипін» мініп жүйткітіп жүрген кейбір алпамсадай жігіттердің мүгедектігі бар адам­дар ретінде мемлекеттен жәрдемақы ала­тынына таңданатындықтарын айтқан еді. «Ондайлар мүгедектігі бар екені туралы қа­ғазды қолдан жасатып, мемлекеттен алатын жәрдемақы есебінен машиналарының бен­зині­нің құнын өтеп жүрген қулар секілді», деп күлген болатын. Расында да, Атырау облысы бойынша Еңбек, әлеуметтік қорғау және көші-қон департаментіндегі сияқты, мүгедектігі бар туралы анықтама параға ұзартылып қана қоймай, сатылатын да болса, тепсе темір үзетін жігіттердің арасынан осындай «батпан құйрыққа» кетәрі болмайтындар шығуы әбден мүмкін. Сондықтан бұл салада жаппай тексеріс жүргізіп, темірдей тәртіп орнатуға күш салатын кез келген тәрізді.

Ал Қаржы мониторингі агенттігі Қарағанды облысы бойынша департаментінің қызметкерлері биылғы қаңтар айында «Қамқор» жедел-профилактикалық іс-шарасын өткізу барысында жергілікті Ардагерлер үйінің қызметкерлерін сол мекемеде тұрып жатқан 25 зейнеткер мен мүгедектігі бар адамның жалпы сомасы 1,3 миллион теңге зейнетақысы мен жәрдемақысын жымқырып, өзара бөлісіп жатқан сәтінде қолға түсірген. Олар мұндай қылмыстық «кәсіппен» бес жыл бойы айналысқан болып шықты.

Осы орайда қуаты тайған қариялар мен мүгедектігі бар адамдарға жанашыр болады деген үлкен сенім жүктелген басшы кадрлардың адамгершілік дең­ге­йінің қандай екені, ең алдымен, Еңбек және халықты әлеуметтік қорғау ми­нис­трлігінің шенеуніктерін қатты ой­лан­дыруға тиіс. Бәлкім, мемлекеттік қыз­метшілердің парасаттылығын һәм жем­қор­лықтан адалығын тексеруге арналған Integrity check тетігін осы министрліктің халықпен қоян-қолтық жұмыс істейтін өңірлік департаменттері мен жер-жердегі Ардагерлер үйлерінің басшыларына да қолдану керек шығар. Алайда аталған министрлік әзірге бәрін қағаз жүзінде «қатырып» жатқанға ұқсайды. Мәселен, 2021 жылғы сыбайлас жемқорлыққа қарсы іс-қимыл туралы ұлттық баяндамада «Еңбек және халықты әлеуметтік қорғау ми­нистрлігі медициналық-әлеуметтік сарап­таманың барлық бөлімшелерінде бейне-бақылау жүйесін және азаматтардың әртүрлі органдарға сабылып, қағаз толтыру машақаты мен қызмет көрсетушілермен тікелей байланысын болдырмай, мүгедектік белгілеу үшін оны қашықтан өткізу форматын енгізуді қамтамасыз етті», деп тайға таңба басқандай етіп жазылған. Бірақ Аты­рау­да әшкере болған сорақы жағдай сөз бен істің арасы жер мен көктей алшақ екенін көрсетіп берген сияқты. «Домбырам не дейді, мен не деймін?» демекші, «Министрлік не дейді, ал оның департаменті не істейді?», деген сауал көкейге келіп, қынжылтып-ақ тұр.

Соңғы жаңалықтар

Коронавирус жұқтырғандар көбейді

Коронавирус • Бүгін, 10:29

Газеттер «сөйлеген» күн

Қазақстан • Бүгін, 08:34

Түркияда бақ сынайды

Спорт • Бүгін, 08:33

Әбиба қола алды

Спорт • Бүгін, 08:32

«Уимблдон» додасы басталды

Спорт • Бүгін, 08:30

Байтұрсыновқа арналған байқау

Ахмет Байтұрсынұлы • Бүгін, 08:22

Мемлекетті айыптап отыр

Әлем • Бүгін, 08:17

Сал-серінің соңы

Қазақстан • Кеше

GGG – CANELO: Ер кезегі үшке дейін...

Кәсіпқой бокс • Кеше

Алаш ардақтысын түркі әлемі ұлықтады

Ахмет Байтұрсынұлы • Кеше

Ұқсас жаңалықтар