Аудан орталығындағы мәдениет үйінің алаңында қаз-қатар киіз үйлер тігіліп, есік алдында жас келіндер самаурын қойды. Шай қайнағанша, шырылдаған майға бауырсақ пісірісті. Облыстық байқауға алғаш рет қатысып отырған Анжелика қазақтың салт-дәстүрі оған таңсық емес екендігін айтады. Ол екі жыл бұрын қазақ отбасына келін болып түсіпті.
– Алғашқы күндері қазақтың әдет-ғұрыптары маған таныс емес еді. Уақыт өте, көп дүниені үйрендім. Қазір қамыр илеу, нан жаю, бауырсақ, шелпек пісіру – күнделікті жұмысым. Бүгінгі сайысқа жұбайым,10 айлық қызым қолдау көрсетіп, келіп отыр, – дейді Өскемен қаласынан келген қатысушы Анжелика Шабданбекова.
Байқауға облыстың әр ауданынан келген 16 келін қатысты. Көңілді іс-шараның көрермендері алғашқы бөлімде «Жас келіннің бір күні» атты бейнероликті тамашалады. Мұнда келіндер өздерінің бір күндік тыныс-тіршіліктерін түсірген еді. Одан кейінгі «Ас – адамның арқауы» кезеңінде ұлттық тағамдар әзірлеп, ұмытылып бара жатқан ас түрлерін ұсынды. Олардың дайындалу жолдарын түсіндірді. Интеллектуалдық бөлімде қазақ халқының салт-дәстүрлері, әдет-ғұрыптары төңірегіндегі сұрақтарға жауап берді. Ал шығармашылық сайыста бірі ән айтты, бірі би биледі, енді бірі мәнерлеп өлең оқыды... Ең соңғы «Ақ орамал» бөлімінде әр ұлт өкілінің қатысушысы келіннің басына байлайтын орамалдың шығу тарихы, ерекшелігі, орамалды тағу мәдениеті туралы егжей-тегжейлі айтып берді.
Сайыстың негізін қалаған Арайлым Есімбекованың айтуынша, дәстүрлі түрде өтіп келе жатқан «Аяулы жас келін» байқауы Достық үйінің 30 жылдығына орайластыра ұйымдастырылды.
– Бұған дейін тек қазақ қыздары қатысып келген байқаудың ауқымы кеңейіп, өзге ұлт өкілдері де қатысуға ниет білдірді. Енді біз басқа этностардың салт-дәстүрлерімен және ерекшеліктерімен танысуға мүмкіндік алдық, – дейді А.Есімбекқызы.
Сөйтіп жас келіндердің ақылы мен парасаты сынға түскен байқау өз мәресіне жетіп, жеңімпаздар анықталды. «Аяулы жас келін» байқауында үшінші орынды Өскеменнің атынан сынға түскен Анжелика Шабданбекова иеленсе, екінші орын Глубокое ауданынан Ажар Төлеуқанова мен риддерлік Ардақ Малтаеваға бұйырды. Бас жүлдені сонау Абай ауданынан келген Айдана Байтөсова жеңіп алды. Қатысушылардың барлығы алғысхаттармен, жүлдегерлер бағалы сыйлықтармен марапатталды.
Шығыс Қазақстан облысы,
Глубокое ауданы
