![Алтын қыз](/media/2022/05/19/5215.jpg)
Оның келбетіне, дене бітіміне көз жүгірткен жан көркем гимнастикамен айналысады деп топшылауы мүмкін. Үш мүмкіндік берілсе де, дәл таба алмайтынына сенімдіміз. Намысшыл ару кикбоксингпен айналысады. Иә, қағыс естіген жоқсыз. Шара аталған спорт түрінен халықаралық дәрежедегі спорт шебері және жекпе-жектен спорт шебері!
– Спорттық жолымды 2013 жылы бастадым. Ол кезде 19 жаста едім, «қолымды мезгілінен кеш сермедім» деуге болады. Спортқа кішкентай кезден бастап барады ғой. Мен болсам, сол жасқа дейін бірде-бір спорт секциясының босағасын аттап көрмеппін. Көбінің қоятын сұрағы бір. «Неге ерлерге тән спорт түрін таңдадың?» деп қызығушылық танытады. Бала кезімде теледидардан төбелес туралы кинолар жиі көрсетілетін. Солардың бірі танымал актер Жан Клод Ван Дамм түскен «Кикбоксер» деген туынды болатын. 9-сыныптан бастап кикбоксинг спортына қатты құмарта бастадым. Кейін оқуда түрлі емтихандарға дайындық кезеңі басталды. Осылайша, 11-сыныпқа дейін спорт туралы мүлдем ойлаған емеспін. Мектепті тәмамдап,
колледжге оқуға түскен кезде кикбоксинг секциясына жазылдым. Шынымды айтсам, спорт менің өмірімді қатты өзгертеді деп ойламаппын. Алғашқы бапкерім – кикбоксингтен халықаралық дәрежедегі спорт шебері Ерсайын Қасамбаев. Жарты жылдан кейін Қазақстан Республикасының еңбек сіңірген жаттықтырушысы Сабыржан Жақыповтан тәлім ала бастадым. Алғашқы жарысым 2014 жылы Қарағанды қаласында өткен Қазақстан кубогы сарапқа салынған бәсеке еді. Онда күміспен күптелдім. Бұдан кейін бапкеріммен бірге қателіктерімді түзеп, алтын медаль аламын деген мақсат қойдым. Тынымсыз дайындықтың арқасында арманыма жеттім де. 2016 жылы өткен ел чемпионатында жеңімпаз атанып, кикбоксингтен спорт шебері нормативін орындадым. Сондай-ақ ұлттық құраманың қатарына қабылдандым. Осылайша, халықаралық жарыстарға қатыса бастадым. Ендігі мақсат халықаралық дәрежедегі спорт шебері атағына қол жеткізу еді. Оған 5 жыл уақыт қажет болды. Былтыр Будапешт (Мажарстан) қаласында өткен Әлем кубогы жарысында алтыннан алқа тағып, тағы бір мақсатым орындалды. Әрине, әлі де биік армандар аз емес. Жас спортшыларға айтарым, мақсатыңа қол жеткізу үшін жалқаулыққа салынбай, аянбай тер төгу керек. Алынбайтын қамал жоқ екенін ұмытпаңыз, – дейді Ш.Хамзина
Бүгінде спортшы қыз келесі жарыстарға тыңғылықты дайындалуда. Оны сұхбат алу үшін хабарласқан сәтте аңғарып үлгердік. Телефон арқылы 10-15 минут ақпарат берді де, қайтадан спорт залына кіріп кетті.
Павлодар облысы