Парижде тосын нәтижелер тіркелуде

Әлемнің алтыншы ракеткасы Онс Жабердің осы жарыс­та «алысқа шабатынына» күмән­данғандар кемде-кем еді. Өйт­кені тунистік теннисші грунтта өте жақсы ойнайды. Соңғы бір-екі ай аралығында ол Мадридтегі WTA турнирінде топ жарып, Римдегі доданың фина­лында өнер көрсетті. «Ролан Гар­ростың» соңғы екеуінде Онс төртінші кезеңге дейін жетіп, былтыр Уимблдонның ширек финалына шықты. Бірақ бұл жолы Жабердің жолы болмады. Ол ойда-жоқта үздіктер тізімінде 56-орында тұрған польшалық Магда Линеттен ұтылды.

Кезінде «Ролан Гарроста» топ жарып, қазіргі кезде WTA рейтингінде 10-сатыға жайғасқан Гарбинье Мугуруса 37 жастағы эстониялық теннисші Кайя Канепиге есе жіберді. Осыдан екі-үш жыл бұрын ғана «Үлкен дулыға» санатына енетін Париж бен Мельбурндегі турнирлердің финалында ойнап, Лондонда дара шыққан Доминик Тим АТР тізімінде 89-орынға тұрақ­таған боливиялық Уго Дельен­ге жол берді. Әйелдер ара­сындағы ең бай теннисші, АҚШ пен Аустралияның ашық біріншіліктерін екі реттен ұт­қан Наоми Осака да еліне еңсесі түскен күйде оралды. Жа­понияның жұлдызы АҚШ-тың аруы Аманда Анисимовадан айласын асыра алмады. Міне, аталған турнирдің алғашқы кезең­інде осындай тосын нәти­желер тіркелді.

Қазақстандық теннисшілер жайында айтар болсақ, Парижде үш ойыншымыз бақ сынауда. Елена Рыбакина дүниежүзілік рейтингте 78-орында тұрған 31 жастағы нидерландтық Аранча Руспен шеберлік байқасты. Алек­сандр Бублик АТР тізімінде 65-сатыға жайғасқан франциялық Артур Риндеркнешпен күш сынас­ты. Бұл ойындар дүйсенбіде басталған еді. Алғашқы сеттер­де жерлестеріміз жеңіп жатты. Бірақ Лондонда толассыз жау­ған жаңбыр жарыстың бере­кесін кетірді. Содан барлық кезде­су­лерді кейінге шегеруге тура келді. Келесі күні турнир қайта жалғасты. Бір қуаныштысы, Рыбакина да (6:1, 5:7, 6:2), Бублик те (6:2, 6:4, 6:4) шабысынан жаңылмай, келесі кезеңде күш сынасу мүмкіндігіне ие болды. Юлия Путинцеваның қарсыласы да анау айтқандай аса мықты болған жоқ. 27 жас­тағы румыниялық Ирина Бара осы күнге дейін «ТОП-100» ойыншының қатарына қосыла алмай жүр. Юлия оны оңай еңсерді – 6:3, 6:1.

Екінші кезеңде Юлия Путин­цева италиялық Камила Джорд­жимен, Елена Рыбакина америкалық Кэти Волынецпен, ал Александр Бублик сербиялық Миомир Кецмановичпен күш сынасады. Бұл ойындардың барлығы да бүгін өтеді.