Спорт • 26 Мамыр, 2022

Балғын спортшылар «Министр кубогын» сарапқа салды

15 рет көрсетілді

Елордадағы Жақсылық Үшкемпіров атындағы жек­­пе-жек сарайында Мә­дениет және спорт ми­­нис­трінің кубогына арналған алғашқы ірі турнирдің фи­налдық ке­зеңі өтті. Қа­зақтың даңқ­ты балуаны, Мәс­кеу Олимпиадасы чем­пио­нының есімі берілген зәулім спорт кешенінде еліміздің олимпиадалық спорт интернаттары мен колледждерінің 2006-2007 жылдары туған жасөспірім спортшылары екі күн бойы жанкүйерлерге тамаша спорттық мерекені ұсынды.

Мемлекет басшысы Қасым-Жомарт Тоқаев 2022 жылды елімізде «Балалар жылы», деп жариялаған болатын. Президент өз сөзінде өскелең ұрпақтың болашағына баса мән беретінін, жастарға зор үміт артатынын айтқан еді. «Жастарымыз атқарылып жатқан ауқымды жұмыстың, реформалардың игі­лігін міндетті түрде көреді. Олардың арасында көзі ашық, көкірегі ояу, ойы ұшқыр азаматтар аз емес. Біз өскелең ұрпаққа жол ашу үшін барлық жағдайды жасауымыз керек. Олардың амандығы – мемлекетіміздің жар­қын болашағының сенімді кепілі. Сондықтан да 2022 жылды «Балалар жылы», деп жариялау керек деп есептеймін. Әңгіме жалаң ұран мен мерекелік шаралар туралы емес. Ең алдымен, билік тарапынан балаларды қорғау үшін денсаулық сақтау, білім беру, әлеуметтік қолдау бағытында нақты шаралар қолға алынуы керек. Өскелең ұрпақтың үйлесімді дамуы мен бақытты балалық шағы – біздің жалпыұлттық міндетіміз», деді Қасым-Жомарт Тоқаев.

«Балалар жылына» орай тұң­­­ғыш рет ұйымдастырылған «Ми­­нистр кубогы» бір ай бойы елі­міздің бірнеше қаласын­да өткізілді. 2-24 мамыр ара­лы­ғында республиканың 17 ма­мандандырылған оқу орны­ның өкілдері Олимпиада бағдар­ламасына енген және елімізде кең тараған спорт түрлерінен, атап айтқанда бокс, дзюдо, грек-рим және еркін күрес түрлерінен бас жүлде үшін бақ сынады.

Сәуір айында елордадағы «Қа­зақстан» жеңіл атлетика кешенінде жарыстың жеребе тарту рәсімі өтіп, онда 17 команда төрт топқа бөлінді. Одан әрі командалар Нұр-Сұлтан, Алматы, Ақтөбе және Тараз қалаларында аймақтық іріктеу жарыстарында бақ сынады. Яғни әр топтағы командалар айналмалы жүйе бойынша бір-бірімен кездесіп, төрт спорт түрі бойынша жеңіп алған медальдарының сапасы жағынан бірінші орын алған командалар жартылай финалға шықты. Жартылай финалда А тобының жеңімпазы С тобының үздігіне, В тобының мықтысы D тобының жеңімпазына қарсылас атанды. Іріктеу сайыстарының қорытындысы бойынша, өз топтарында оза шапқан Кәркен Ахметов атындағы олимпиада резервінің республикалық маман­дандырылған мектеп-интернат-колледжі (Ал­ма­ты қаласы), Жа­лаң­төс Баһа­дүр Сейітқұлұлы атындағы олим­пиа­да ре­зерв­тің облыстық ма­ман­­дан­ды­рылған мектеп-интернат-колледжі (Қы­зылорда облысы), Қа­жымұқан Мұңайтпасұлы атын­­дағы олимпиада резер­ві­­нің республикалық маман­дан­дырылған мектеп-ин­­тернат-колледжі (Нұр-Сұл­тан қаласы) және Әлия Молда­ғұлова атындағы облыс­тық ма­мандандырылған олимпиа­далық резервтегі мек­теп-интер­нат-кол­леджінің (Қара­ған­ды облысы) спортшылары 22-24 мамыр ара­лығында «Министр кубогын» сарапқа салды.

– Спортшылар мен жаттық­ты­рушылар және болашақ чем­пиондардың ата-аналары үшін шын жүректен қуаныштымын. Өңірлерде осы жарысты өткізу туралы бастаманы үлкен ынтамен қарсы алғандары қуантады. Күрделі іріктеу кезеңдерінен кейін елордада ең мықты спорт­шылар жиналды. Бұл жарыс­тардың атмосферасы сіздерге жағымды эмоция мен әдемі әсер сыйлайды, ал жарқын жеңіс қосымша серпін мен мотивация береді деген сенімдемін, – деді жарыстың ресми ашылу салтанатында сөз алған Мәдениет және спорт министрі Дәурен Абаев.

Спорттық іс-шараның алғаш­қы күніндегі жартылай финал бәсекесінде қарсыластарына жол берген Ә.Молдағұлова атын­дағы олимпиадалық резервтегі интернатының спортшылары мен Жалаңтөс Баһадүр атындағы олимпиадалық резервтің маман­дандырылған мектеп-интернат-колледжінің өкілдері ертесі күні турнирдің қола жүлдесін сарапқа салды. Үшінші орынға таласқан жас спортшылар татами, ринг және бозкілемде жан алысып, жан берісті. Нәтижесінде, спорттың төрт түрі бойынша жал­пы есепте мықтылық та­ныт­қан Қызылорда облысының жас өрендері жеңімпаз атанып, тур­нир ережесіне сай жарыстың қола жүлдесі мен қосымша 2 млн теңге көлемінде қаржылай сыйақыға ие болды.

Ал шешуші сайыс­та Қ.Мұң­айт­­пасұлы атын­да­­ғы олимпиа­да резерві­ республикалық ма­ман­­дан­дырылған мектеп-ин­тер­нат-колледжі мен К.Ахметов атын­дағы олимпиада резер­ві республикалық маман­дан­дырылған мектеп-интернат-кол­леджінің спортшылары «қос құлақты» кубокты жеңіп алуға барын салды. Финалдық шешуші айқас болған соң барлық бәсеке өте тартысты өтті. Өйткені кез келген бір жеңілістің өзі, бол­­машы қателіктің салдары ко­ман­­дасын жүлдеден қағуы әбден мүмкін еді. Сондықтан сайысқа шыққан спортшылардың ешқайсысы да жеңілгісі келмей, бар күш-жігерін алаңда қалдырып, соңғы демі қалғанша жеңіс үшін күресті. 

Бозкілемде белдескен ба­луан­­дардың, татамиде өнер көрсеткен дзюдошылардың тама­ша айла-тәсілдері, шаршы алаңдағы был­ғары қолғап шеберлерінің әрбір жасаған соққысы спорт кешеніне жи­нал­ған жанкүйерлердің қо­шеметіне бөленіп отырды. Нәти­жесінде, бокс, еркін және грек-рим күресінде жеңіске же­тіп, тек дзюдо бәсекесінде ға­на қарсыласына жол берген елор­­далық Қ.Мұңайтпасұлы атын­дағы олимпиада резер­ві мектеп-интернат-колледжі спорт­шылары тұңғыш рет ұйым­­дастырылған республи­ка­лық «Министр кубогы» жа­ры­сының жеңімпазы атанып қана қоймай, Мәдениет және спорт министрі Дәурен Абаевтың қо­лынан кубок пен 5 миллион теңге қаржылай сыйақы алды. Екінші орынға табан тіреген алматылық спортшыларға 3 млн теңге сыйақы берілді.

Сонымен қатар турнирде жекелеген аталымдар бойынша да үздік атанған спортшылар арнайы марапатқа ие болды. Атап айтар болсақ, бокстан 80 кило салмақта өнер көрсеткен елор­далық Расул Асаханов (Қ.Мұңайтпасұлы атындағы олим­пиада резерві) «Үздік техни­касы үшін», еркін күресте 71 килоға дейінгі салмақта белдес­кен алматылық Данила Таурбаев (К.Ахметов атындағы Олимпиада резерві) «Жеңіске деген жігері үшін», дзюдода 60 килоға дейінгі салмақта күрескен қарағандылық Дияс Таңатқан (Ә.Молдағұлова атындағы спорт интернаты) «Үз­дік әдісі үшін» және грек-рим күресінен 80 килоға дейінгі сал­мақта бақ сынаған Нұр-Сұлтан қаласының тағы бір ба­луаны Аса­нәлі Серікбаев «Көрермен көзайымы» аталымдарында жеңім­­паз атанды. Жоғарыда атал­­­ған барлық спортшыға жарыс­ты ұйымдастырушылар ынталан­дыру ретінде 250 мың теңге көле­мінде қаржылай сыйақы берді.

Жарыс соңындағы жеңімпаз­дар мен жүлдегерлерді марапат­тау салтанатына Мәдениет жә­не спорт министрі Дәурен Абаев­тан бөлек,  бокстан Олимпия ойындарының екі дүркін күміс жүлдегері, әлем чемпионы Болат Жұмаділов, дзюдодан Олимпия ойындарының күміс жүлдегері Асхат Жіткеев, еркін күрестен әлем және Азия чемпионатының күміс жүлдегері Нұрлан Бекжа­нов, сондай-ақ грек-рим күре­сінен әлем чемпионатының бес дүркін жүлдегері және Азия чем­пионы Алмат Кебіспаев қаты­сып, екі күн бойы спорт са­райының шаңын қаққан жас ізбасарларының жарқын өнер­леріне дән риза болып, болашақта олар да ел намысын халықаралық ареналарда, Олимпия ойындары мен әлем біріншіліктерінде лайықты түрде қорғайтынына сенім білдірді. 

Соңғы жаңалықтар

Шымкентте Қонаев даңғылы ашылды

Аймақтар • Бүгін, 17:58

Алматы маңында жер сілкінді

Аймақтар • Бүгін, 16:42

Алматыда үшінші вокзал салынады

Аймақтар • Бүгін, 14:59

Доллар арзандады

Экономика • Бүгін, 14:08

Ұқсас жаңалықтар