Бəріміз жұмылып Жаңа Қазақстанды құруға бет алдық. Қ.Тоқаев Қазақстан Президенті болып сайланғаннан бастап өзінің басты ұстанымы əділеттілік екенін, онсыз қоғам ешқашан дамымайтынын айтып келеді.
Қоғам əділеттілік салтанат құрғанда ғана жаңарады, дамиды. Сыбайлас жемқорлық, ұлттық байлықтың теңдей жəне əділ бөлінбеуі, азаматтардың құқықтарының қорғалмауы, заңдардың толыққанды орындалмауы билік саясатының әділеттілігіне байланысты. Ел дамуы қоғамдағы келісім мен ынтымаққа, ауызбіршілікке тікелей байланыста болса, ол тек əділеттілік бар жерде ғана болады. Өйткені әділеттілік – тəуелсіздіктің темірқазығы. Биыл 5 маусымда өтетін республикалық референдумның күн тәртібіне қойылған Конституциялық реформаның түйіні де түптеп келгенде әділеттіліктің салтанат құруына бағытталған.
Конституциялық реформа – Президенттің саяси реформалар бағдарламасын жүзеге асыру үшін қолға алынған маңызды саяси іс-шара. Конституциядағы өзгертулер мен толықтырулар жобасы Қазақстан халқының көкейінде жүрген сұрақтарға жауап береді жəне бүкіл қоғамның мүддесі үшін жүзеге асырылады.
Осы күнге дейінгі Ата Заңымызға енгізілген өзгерістер халықтың қатысуынсыз парламент арқылы өткізіліп келді. Халықтың пікірі ескерілмеді. Ол өзгерістердің барлығы президент билігін нығайтуға, күшейтуге бағытталды. Ал ендігі қабылданатын Конституцияның ерекшеліктері суперпрезидентік басқарудан президенттік республикаға көшуге, парламент пен мәслихаттардың өкілеттіктерін көтеруге, ел басқаруда халықтың қатысу мүмкіндігін кеңейтуге, елдегі саяси күштердің белсенділігі мен бәсекелестігін арттыруға, қоғамда әділеттіліктің орнатылуына, Жаңа Қазақстан құрудың құқықтық негізін қалауға, адамдар құқықтарын қорғауды жетілдіруге бағытталған. Бір сөзбен айтқанда, Конституциядағы өзгертулердің көздегені – мемлекетімізді жетілдіру, жаңғырту жəне нығайту. Мемлекетіміздің дамуының жаңа кезеңінде, Жаңа Қазақстанды құруға бағытталған, еліміз үшін осындай аса маңызды тарихи шешімдерді Президент бүкілхалықтық талқылауға салып, көпшіліктің шешіміне сүйеніп қабылдауды ұсынып отыр. Конституциялық түзетулер жобасының бүкілхалықтық жаппай дауыс беру арқылы қабылдануы біздің демократиялық қағидаттарды берік ұстанатынымызды білдіреді.
Алдағы референдумды халқымыздың басым көпшілігі қолдайды. Алайда Конституцияның қазіргі жəне жаңа нұсқаларының айырмашылығын түсіну, ұсынылып отырған өзгертулер мен түзетулердің байыбына бару күнделікті тыныс-тіршілігімен жүрген қарапайым жұртқа қиындық туғызатыны рас. Сондықтан да референдум, онда қойылған мәселелер туралы халық арасында түсіндіру жұмыстарын жүргізіп, еліміздің дамуына бағытталған стратегияның мəнін жеткізуге барынша күш салуымыз керек.
Бүкілхалықтық референдум өткізілетін күнге аз уақыт қалды. Сондықтан осы қысқа мерзімді барынша тиімді пайдаланған жөн. Алайда ел арасындағы кездесулерде, әлеуметтік желілерде айтылып жүрген сөздерді, пікірлерді тыңдасаң, көп азамат әлі де референдум мен Ата Заңымызға ұсынылған өзгерістерді толық түсіне қоймағанын байқаймыз. Олар конституциялық өзгерістердің мазмұнын жете түсіне алмауда. Сондықтан БАҚ арқылы беріліп жатқан референдум туралы ақпараттық хабарламалармен бірге, тікелей эфирлерде, газет беттерінде, әлеуметтік желілерде «Сұраққа жауап», «Ашық алаң», «Пікірталас» сияқты іс-шаралар көбірек өткізілсе дұрыс болар еді. Конституциядағы өзгеріс енгізілген әр баптың ескі және жаңа редакциясына талдау жасап, ұсынылып жатқан баптардың артықшылықтары, ол қоғамға қандай өзгеріс әкеледі, елді дамытуға, халықтың жағдайын жақсартуға қалай әсер ететіндігі туралы көпшілік түсінетіндей мағлұматтар берілгені жөн. Парламент пен мәслихат депутаттары, Үкімет пен жергілікті атқарушы органдар, саяси партиялар мен қоғамдық ұйымдар референдум туралы, референдумға қойылған мәселелер туралы Президент, Парламент сайлауы кезіндегідей әр таңдаушыға жан-жақты түсіндіру жұмыстарын жүргізгендері жөн. Түсіндіру жұмыстарына студенттерді де пайдаланған дұрыс. Әрбір қазақстандық осындай тарихи сəтте, шешуші кезеңде ел болашағын айқындауға тікелей атсалысуы қажет. Референдумда əр азаматтың дауысы маңызды. Біз референдумға қатысу арқылы еліміздің бірлігі мен ынтымағын нығайтуға, өзіміздің заңмен қорғалуымызға, сапалы өмір сүруімізге, жемқорлықтың жойылуына, мемлекеттік қызметтің ашық, қолжетімді болуына, еліміздің жарқын болашағына дауыс береміз.
Еліміз үшін ең басты мақсат – халқымыздың әл-ауқатының артуы. Экономикалық жетістіктерімізді әр қазақстандық сезінуге тиіс. Оған қол жеткізу үшін үздіксіз дамып, үнемі өрлеп, өркендеуіміз керек. Қазақстан – демократиялық мемлекет. Осындай жауапты кезеңде референдумға қатысу азаматтардың тек өзін-өзі құрметтеуі ғана емес, жалпы Қазақстанның болашағы алдындағы, ұрпақ алдындағы жауапкершілігін көрсетеді. Сондықтан референдумға белсенді түрде қатысып, өз таңдауларын жасау – әр қазақстандықтың азаматтық міндеті.
Қуаныш АЙТАХАНОВ,
қоғам қайраткері
