![Мемлекеттік моделді трансформациялау](/media/2022/05/30/200830173046732e.jpg)
Референдумды қоғамдық қолдау республикалық штабының қолдауымен өткен іс-шараны Ақпарат және қоғамдық даму министрлігінің «Қазақстандық қоғамдық даму институты» КеАҚ ұйымдастырды.
Жиынға қатысушылары алдағы референдумның елді дамыту мен қоғамды демократияландырудағы маңызын, сондай-ақ Жаңа Қазақстанды құрудағы конституциялық реформаның рөлін талқылады. Сарапшылар мемлекеттің басты құжатына енгізілетін өзгерістер мен толықтырулардың еліміздің саяси жүйесіне қалай әсер ететіні туралы пікір алмасты.
Жиынға Ақтау қаласы әкімінің орынбасары Әбілқайыр Байпақов, облыстық және қалалық мәслихат депутаттары, мемлекет және қоғам қайраткерлері, саясаттанушылар, сондай-ақ Қазақстанның қоғамдық даму институтының сарапшылары қатысты.
Іс-шараға модераторлық жасаған «Қазақстандық қоғамдық даму институты» КеАҚ басқарма төрағасының кеңесшісі Самат Нұртаза алдағы референдум мемлекеттің саяси жүйесін демократияландыру мен либерализациялау жүріп жатқанын көрсететінін атап өтті. «Бұл мемлекетті өзгерту мүмкіндігі. Мемлекет басшысы халықпен ақылдасып, жауапкершілікті бөлісіп және халықтың кері байланысқа шығуын қалайды. Бізге либерализмді, демократияны және ең бастысы әділеттілікті таңдау ұсынылады», деді ол.
Отырыста сөз алған Ақтау қаласы әкімінің орынбасары Əбілқайыр Байпақов: «Конституциялық реформа бүкіл мемлекеттік модельді кешенді түрде трансформациялауға бағытталған. Біз еліміздің болашағына немқұрайды қарамауымыз керек. Қазақстанның болашағы біздің қолымызда, біз қабылдайтын шешімдерден құралады», деді.
Маңғыстау облыстық мәслихатының депутаты Аббат Өрісбаев Президенттің бастамасын қолдауға шақырып, бұл өзгерістер халық өтінішіне деген жауап екенін атап өтті. «Халық конституцияға енгізіліп отырған өзгерістерді қолдап жатқандығын байқап жүрміз, дегенмен әрбір азаматтың дауысы маңызды болғандықтан өткізілгелі отырған референдум туралы неғұрлым көп ақпарат айтып, ақпараттандыру жұмыстарын қарқынды жалғастыру керек», деді ол.
Соңғы әлеуметтік сауалдама нәтижелері бойынша референдумды халықтың 72%-дан астамы қолдаған. Бұл туралы ҚҚДИ сарапшысы Жақсыбек Жиеналиев мәлімдеді. «Конституцияға өзгерістер мен толықтыруларды енгізу бұған дейін де болғаны белгілі. Осы уақытқа дейін өзгертулер Парламент қарауына ұсынылып, депутаттардың мақұлдауымен өзгеретін.
Соңғы әлеуметтік сауалдаманың нәтижесі бойынша 72%-дан астам халық референдумды қолдап отыр. Бұл жақсы көрсеткіш, азаматтарымыздың саяси белсенділігі жоғары екені байқалады. Қазақстанда 11 миллионнан астам адам республикалық референдумға қатыса алады, олардың басым бөлігі жастар. Яғни 18-45 жас аралығындағы әрбір қазақстандық бірінші рет өз таңдауын жасап, еліміздің әділ әрі дамыған мемлекет болуына өз үлесін қосайын деп отыр», деп атап өтті А.Өрісбаев.