«Еліміз үшін тарихи оқиғаға айналған референдум республика бойынша жоғары деңгейде өтті. Он жеті өңірдегі өкілдіктеріміз бен байқаушыларымыз бірінші кезекте саяси науқанның әділ өтуіне мүдделі болды. Жалпы 10 мыңға жуық референдум учаскесіне барған біздің 20 мыңға жуық байқаушымыз саяси науқанда ешқандай ереже бұзу дерегі тіркелмегенін хабарлады. Біз байқаушыларды бұл науқанға барлық талаптарға сай дайындадық. Олар өз кезегінде жұмысты сапалы атқарды», деді қоғамдық бірлестік төрағасы жағдайды түсіндіріп.
Төлеген Күнәділовтің айтуынша, әр округте екі байқаушы өз міндетін талапқа сай жауапкершілікпен атқарған. Ал байқаушылардың орташа жасы 44 жас екен.
«Барлық өңірдегі учаскелерге барған байқаушыларымыз таңғы сағат алтыдан референдум аяқталғанға дейін тынымсыз жұмыс істеп, дер кезінде мәлімет беріп отырды. Бір қызығы, Қарағанды мен Шығыс Қазақстан облысында түскі 15.00-16.00 аралығында сайлаушылар 100 пайыз дауыс берген учаскелер анықталды. Әрине, аталған учаскелер елді мекендерде орналасқандықтан, сайлаушылардың саны да көп емес. Содан да болса керек, халық ертерек келіп, азаматтық борышын орындаған», деді ол өз ойымен бөлісіп.
Баспасөз мәслихатының соңында қоғамдық ұйымның жетекшісі бірлестік алдағы уақытта да саяси науқандарға белсене қатысуға ниетті екенін жеткізді.
