Дала демократиясының жалғасы

Осынау алқалы басқосуды баршамыз асыға күткеніміз белгілі. Олардың қатарында үкіметтік емес ұйым өкілдері де бар. Бір анығы, Ұлттық құрылтай қазақстандық қоғамды ұйыстыратын орталыққа айналғанын жан жүрегімізбен сезіндік.

Қасым-Жомарт Тоқаев алқалы басқосуда жалпыұлттық бірлікті нығайту турасындағы толғамды ойларын ортаға салды.

«Демократия дегеніміз – кере­мет өмір туралы жалпылама ұғым, түсінік емес. Бұл – күн­де­лікті тынымсыз еңбекті талап ететін өркениетті өмір салты. Атаққұмарлар мен алаяқтардың жалаң ұраны мен құрғақ уәдесіне алданбау қажет. Еліміздің болашағы үшін аса маңызды мәселелерді дау-дамаймен емес, ұтымды ой-пікірмен, парасатты пайыммен және саналы көзқараспен шешкеніміз абзал.  Біз «түрлі көзқарас, біртұтас ұлт» қағидатын берік ұстануымыз қажет. Бір-біріміздің ой-пікірімізді тыңдап, құрметтей білсек, алға қадам басамыз» деген Президент сөзі баршамыздың көңілімізге қонды.

Ұлттық құрылтайдың алғашқы отырысына қатыса алмаған талай азамат өз ойларын айтып жатыр. Алдағы уақытта олар да рота­ция ережесіне сәйкес келесі бас­қосу­ларда бой көрсетуі әбден мүм­кін. Мұның барлығы да кезең-кезеңімен іске асырылатын қадамдар екеніне ешқандай күмәнім жоқ.

Ұлттық құрылтайда сөз алған бел­гілі ғалым Асқар Жұмаділ­даев­тың көкейкесті ойлары жүре­гіме жетті. Академиктің білім мен ғылымды өркендету туралы айтқан ойлары өзекті екеніне ешқандай таласым жоқ.

«Сөз бен істің үйлесімі, әдепті­лік, жаңа ұмтылыс. Осы үштаған қапер­де тұрғаны жөн. «Жаңа Қазақ­стан құрамыз» деген ұғым дұрыс бол­ды. Бірақ менің пікірімше, «Жаңа Қазақстан» деген сөз «Ескі Қазақ­­станды» терістеу деген сөз емес.

«Ескі Қазақстанда» да жаңа нәр­селер көп болған. Соның жақсы­сын алып, жаңа сипат беріп, сол халықтың игілігіне жұмсау керек», деген ғалымның пікірі қолдауға әбден лайық екені талас тудырмаса керек.

Халық зор үміт артқан ұлт­тық құрылтайдың жалпыхалық­тық платформаға айналатыны да қуантып отыр. Мемлекет басшысы осылайша сындарлы диалог алаңын орнатты.

Алқалы басқосуға қазақтың қаймақтары қатысқаны мәлім. Алаштың ардақты ақыны Свет­қали Нұржанның сөзі де жігеріміз­ді жанығаны даусыз. Көкейдегі көп ойды қозғаған ақынға айтар алғыс зор. Сондай-ақ күллі қазақ халқы қадірлейтін белгілі ақын, күрескер тұлға Мұхтар Шахановтың Президент қолынан Қазақстанның Еңбек Ері атағын алғаны өте дұрыс шешім болды. Мұндай қадамның барлығы да бізді қуантты. Жоғарыда айтқанымдай, еліміздің кез келген азаматына диалогқа қатысуға, өз ұсыныстарын енгізуге, өз идея­ларын айтуға мүмкіндік беретін Qurultay мобильді қосымшасын құруды ұсынғаны да дұрыс қадам екені рас.

Ұлттық құрылтай бұрынғы дала демократиясының жалғасына айналды. Алдағы отырыстарда да елдің көкейіндегі мәселелер қозғалып, олардың шешім табуына мұрындық болар бастамалармен жалғасын табады деген сенім мол.

Бану НҰРҒАЗИЕВА,

Қазақстан Азаматтық альянсының президенті