«Жетісу» командасы Азия чемпионатында үшінші орын алды

АСТАНА. 25 сәуір. Талдықорған «Жетісу» қыздар волейбол командасы Таиландта өткен Азияның клубтық чемпионатында үшінші орын алды. Бұл туралы egemen.kz тілшісі хабарлады. Қазақстан волейболшы қыздары чемпионаттың топтық турнирінде бес кездесудің төртеуінде жеңіске жетіп, ширек финалға шықты. Ал 1/4 финалда Вьетнам командасын тізе бүктірді. Ал жартылай финалда жапонның «Хисамицу Спрингс» командасынан үш партияда ұтылды. Жаттықтырушы Асқар Шалқыбековтің шәкірттері үшінші орын үшін таласты Тайванның «Тайпей» командасымен өткізді. Қазақстандықтар оның үш партиясын да өз пайдаларына шеше білді. Бірінші партия 25:15 есебімен аяқталды. Екінші партия қатты тартыс үстінде өтіп, жерлестеріміз ең соңғы сәтте жеңісті тартып әкетті – 26:24. Үшінші партияда олар 25:20 етіп тағы жеңді. Еске сала кетейік, жетісулықтар өткен жылы осы турнирде финалға дейін жетіп, қытайлықтарға есе жіберген еді. Дамир Қожамқұл. Дереккөз: egemen.kz. Фото: Қазақстан Волейбол федерациясы.