ХІІ Еуразиялық медиафорумда АҚШ-Иран қатынасы қызу талқыланды

АСТАНА. 25 сәуір. Осымен 12-рет өткізіліп отырған Еуразиялық медиафорумда әлемді толғантқан күрделі мәселелер талқылануда. Соның ішінде АҚШ-Иран қарым-қатынасы кең ауқымда сөз болды. Бұл туралы «Қазақстан» ұлттық арнасы хабарлады. Жиында АҚШ-Иран арақатынасына байланысты түрлі пікірлер айтылды. Иран сыртқы істер министрінің кеңесшісі Сейд Мұхаммед Казим Саджапур: «Иран ядролық бағдарламасын бүкіләлемдік мәселе деп көрсету дұрыс емес. Иран мәселесінің тым саясиланып кеткені соншалықты, бұл миллиондаған адамдардың өміріне кері әсер етуде. АҚШ Иранға қарсы әскери күш көрсетсе, әрине, Иран тиісінше жауап қайтаруға әзір. Өзгелер біздің осы мәселеге қатысты ойымызбен санасқаны жөн», – деді. Ал Израильдің бұрынғы премьер-министрі Эхуд Барак: «Егер Иран ядролық державаға айналса, онда Таяу Шығыс елдеріне ғана емес, әлемге қауіп төндіреді. Мен Израиль қарулы күштерін 7 жыл басқардым. Иранмен түсінісу үшін келіссөздер жүргіздім. Менің пайымдауымша, ирандықтар түрлі әрекеттердің жетегіне еріп, атом энергетикасын дамыту бойынша әлсіздік танытып отыр», – деді. Естеріңізге сала кетейік, бұл алқалы жиынға әлемнің 60 елінен келген 700 делегат қатысуда. Жолдыбай Базар. Дереккөз:  «Қазақстан» ұлттық арнасы. Фото: egemen.kz.