Гидробиология және экология институтының, «Микробиология және вирусология ғылыми-өндірістік орталығы» ЖШС, «Қазақстандық Қолданбалы Экология Агенттігі» ЖШС ғылыми қызметкерлері, сондай-ақ Балық шаруашылығы комитеті, Маңғыстау облысының экология департаменті және ҚР АШМ Ветеринариялық бақылау және қадағалау комитетінің аумақтық бөлімшелерінің құзыретті мемлекеттік органдарының өкілдері қатысқан талқылау нәтижесі бойынша осы жылдың 24 маусымында итбалықтардың өлімі бойынша қорытынды дайындалған.
«Қорытындыға сәйкес, табылған өлекселердің қатты ыдырауына байланысты, өлімнің нақты себептерін анықтау мүмкін болмады. Сонымен қатар ғалымдар мен құзыретті мемлекеттік органдардың пікірінше, жаңа туған күшіктердің мұз үстінде ашық теңізге шығару салдарынан олардың әлсізденуі, күшіктердің суға түсуі салдарынан қатып қалуы, ересек итбалықтардың балық аулау торларына түсуі, сондай-ақ кемелердің бұрандаларына түсуі қырылудың ықтимал себептері болуы мүмкін», делінген ведомство хабарламасында.
Ғылыми ұйымдар мен мүдделі мемлекеттік органдардың өкілдері Каспий теңізінде жүргізіліп жатқан түп тереңдету жұмыстары табылған итбалықтардың қырылуына тікелей әсер етпейді және ықтимал себеп ретінде қарастырылмайды деген ортақ пікірге келді.
Каспий итбалығы трансшекаралық су жануарлары болғанына байланысты, 2021 жылғы қыркүйекте Қазақстан мен Ресейдің XVII аймақаралық ынтымақтастық форумы барысында Қазақстан мен Ресей Экология министрліктері арасында Каспий итбалығының популяциясын сақтау жөніндегі 2021-2026 жылдарға арналған бірлескен іс-қимыл жоспарына қол қойылды.
«Мемлекет басшысы Каспий итбалығы популяциясының азаюын шешу мәселесін жеке бақылауына алды және бүгінгі күні Министрлік Каспий итбалығының көбею және мекендеу орындарын сақтау үшін ерекше қорғалатын табиғи аумақ құру мәселесін пысықтауда. Бүгінгі таңда тиісті жаратылыстану-ғылыми негіздеме әзірленуде.
Бұдан басқа, 2020 жылдан бастап Каспий итбалығы жануарлардың сирек кездесетін және құрып кету қаупі төнген түрлерінің тізбесіне енгізілді (Қазақстан Республикасының Қызыл кітабы) және ҚР Қылмыстық кодексіне сәйкес, жануарлардың сирек кездесетін және құрып кету қаупі төнген түрлерін аулау 3000 АЕК дейін айыппұл салуға немесе 3 жылға дейін бас бостандығын шектеумен жазаланады.
Өз кезегінде, биылғы жылдың көктемінде Каспий теңізінің жағалауында итбалықтардың өлекселері табылғанына байланысты Маңғыстау облысының полиция департаментіне процестік шаралар қабылдау үшін тиісті материалдар жолданды», делінген министрліктің хабарламасында.
