Жуырда Қызылорда қалалық мәдениет және тілдерді дамыту бөлімі ел жадынан өше бастаған осы жақсы дәстүрді жандандырып, қала маңындағы ауыл өнерпаздары қалалықтар алдында өнер көрсетті.
– Қалалық мәдени-демалыс паркінде 13-30 маусым аралығында өткен байқаудың қатысушылары облыс орталығына жақын орналасқан елді мекендер тұрғындары болды. Елдің рухани дүниетанымын жаңғыртып, ұлттық құндылықтарды дәріптеуді мақсат тұтқан байқауды қала әкімдігі қолдап, ауыл өнерпаздары ережеге сай концерттік бағдарлама әзірлеп, кітап және қолөнер көрмесін жасады, – дейді қалалық мәдениет және тілдерді дамыту бөлімінің басшысы Жағыпар Тәжмаханов.
Байқауға қазылық жасағандар Қызылжарма ауылдық мәдениет үйінің өнерпаздары көптігін және концерттік бағадарлама бойынша әр түрлі жанрда өнер көрсеткенін, Тасбөгет кентіндегі С.Майқанова атындағы мәдениет үйі өнерпаздары жүлдегер атанған өнерпаздардан шеру жасап ерекшеленгенін айтып отыр. Ал Қараөзек ауылдық мәдениет үйінің концерттік бағдарламасы көркемдік жағынан ұтымды ұйымдастырылып, осы ауылдағы мәдениет үйінің меңгерушісі Айдос Байкеновтың өнер сайысында алғаш рет орындалған «Ел іші – өнер кеніші» атты әні байқаудың басты табысы болды.
Екі аптадан астам уақыт қалалық паркке жиналғандарға өнер кешін сыйлаған байқаудың бас жүлдесін Қызылжарма ауылдық мәдениет үйі алса, бірінші орын Тасбөгет кентіндегі С.Майқанова атындағы мәдениет үйі ұжымына бұйырды. Екінші орынды Қараөзек ауылдық клубы өнерпаздары, үшінші орын жүлдесін Белкөл кентінің клубы мен Ақсуат ауылдық мәдениет үйі иеленді. Абай ауылындағы мәдениет үйіне, Талсуат және Қарауылтөбе ауылдық клубтарына ынталандыру сыйлығы табыс етілді. Қайта жаңғырған байқау қорытындысында жекелеген қатысушылар да түрлі аталымдар бойынша марапатталды.
Қызылорда
