Кездесу барысында Абайдың «Жидебай-Бөрілі» мемлекеттік әдеби-мемориалдық қорық-музейінде белгілі ақын, Халықаралық «Алаш» әдеби сыйлығының лауреаты, филология ғылымдарының кандидаты, Алматыдағы С.Мұқанов пен Ғ.Мүсіреповтің әдеби-мемориалдық музей кешенінің басшысы Әділғазы Қайырбековтің «Абайға апарар жол» атты шығармашылық кеші өтті. Ақын өзінің сыныптас достарының алдында шығармашылық есебін берді. Ә.Қайырбековтің өмірбаяндық өрнектеріне құрылған Өскемендегі облыстық Жасөспірімдер мен балалар кітапханасы әзірлеген «Кестелі сөздің шебері» атты әдеби-рафт көрсетілді. Кеште сөз алған Абай музейінің директоры, Қазақстан Республикасының еңбек сіңірген қайраткері Тұрдықұл Шаңбай шығармашылық иесі туралы жылы лебізін білдіріп, Семейдегі Абай музейі мен Алматыдағы С.Мұқанов пен Ғ.Мүсіреповтің әдеби-мемориалдық музей кешені арасындағы дәстүрлі шығармашылық байланыстарға тоқталды. Шарада «Абайдың өлеңі», «Сүйемін сені, Семейім» (екеуінің де сөзі Ә.Қайырбековтікі, әні Кентау Назарбектікі) сынды әндер орындалып, ақын жерлестерінің алдында өзінің әр жылдар белесінде жазылған өлеңдері мен балалық шақ балладаларын оқып, тыңдармандарын тәнті етті. Ә.Қайырбеков Абай музейінің кітапхана қорына өзінің он томдық шығармалар жинағы мен «Жандауа», «Назқоңыр», «Бөртостаған», «Мүсіреповтың хатханасы» кітаптарын табыстады.
Әдеби-сазды кешке ақынның сыныптастары, Семей қаласының зиялы қауым өкілдері мен жырға жаны құштар жас жеткіншектер қатысты. Ертеңіне армандастар-сыныптастар Жидебайға барып, Абай мен Шәкәрімнің топырағына тәу етіп, ақ күмбез кесенелерін көріп, рухтарына тағзым жасап қайтты.
Назгүл АЛТАЕВА
