«Бақыт – көпқырлы ұғым» – дейді жас әнші Дария Ғабдулл

Ән көп, әнші көп. Әнші жасап шығарушылар көп. Елімізде осыдан бірнеше жыл бұрын басталған «Суперстар», «Х-фактор» музы­калық байқаулары орындаушы­лардың тұтас бір толқынын сахнаға шығарғаны есте. Табиғи дарыны бар тасты жарып шықты, жоғы орта жолдан қайтты. Солар­дың бірі – «Х-фактор» музы­калық байқауының алғашқы жеңім­пазы, мәреде марқұм Мәдина Ералиеваның орын­­­дауындағы әдемі ән «Айқара­көзді» мөлдірете орындауымен есте қалған Дария Ғабдулл. Дария музыкалық өнер бакалавры мамандығының үздігі. Жуырда жас әншіге өзімізді қызықтырған сауалдарды қойған едік. – Дария, сені алғашқы «Х-фактор» жеңімпазы ре­тінде тани­мыз. Жобадан кейін­гі шығарма­шылығың қа­лай өрбіді? «Sony Music» ком­­па­­ния­сымен арада жасал­ған ке­лісімшарт саған қандай мүм­кін­діктерге жол ашты? – «Х-фактор» музыкалық байқауы­ның шарты бойынша байқау жеңімпазы «Sony Music» халықаралық дыбыс жазу компа­ниясымен келісмшартқа оты­ру құқын алатыны алдын ала жа­рияланған болатын. Бұл – атақты Бейонсэ, Уитни Хьюстон, Джордж Майкл, Кристина Агилера, Шакира, Бритни Спирс, Леона Льюис секілді орындаушылар өз композицияларын жазуға келісімшартқа отырған биік талғамды, жоғары сапалы дыбыс жазу компания­сы. Менімен арада жасалған келісімшарт олардың Орталық Азия аймағы мен Қазақстан атынан шығатын алғашқы орындау­шымен бірінші рет жасап отырған келісімшарты екен. Бұл менің өмірім­дегі ең алғашқы келісімшарт болды. Сондықтан сол сәтте менің жан дү­ниемде не болып жатқанын сөзбен ай­тып жеткізу мүмкін емес еді. Екі жыл­ға созылған біздің әріптестігіміз же­місті – «An affair» («Сүйемін»), «More» («Бәрі менің қолымда»), «Take my love» («Біз бөлінбейтін жандар­мыз») се­кілді үш әннің тұсауы кесіл­ді. Алғашқы әнге Польшада клип түсір­дік. Жақсы жандармен таныстым. Мақ­сатым көп. Ойластырған жобаларым да бар. – «Х-фактор» музыкалық байқауы өміріңе қаншалықты өзгеріс әкелді? – Музыкалық байқау өзім бала жастан армандаған үлкен сахнаға жол ашты. Көптеген достар, жасы үлкен әріптестер таптым, жақсы адамдармен таныстым. Иә, Алматы қаласы менің армандарыма қол жеткізуге мүмкіндік берді. Үлкен сарайларда ән шырқадым. «Х-фактор» жобасы сахна қасиетін ұқтырды. – Өзің қатысқан «Славян базары» жобасы қалай өтті? Жеңімпаздар қатарынан көріну мақсатың орындалды ма? –  «Славян базары» өмірімдегі «Х-фактор» музыкалық жобасынан кейінгі екінші баспалдақ болды. Бұл – белгілі, жоғары деңгейдегі ха­лықаралық конкурс. Осының барлы­ғын өз көзіммен көріп, түсіну бақыты бұйырды. Әр елден келген, жеңімпаз болғысы келетін 20 мықты әншінің ішінен алдыңғы орында көріндім. Бұдан да жоғары бағаға қолым жетуші еді, тек мен жіберген қателіктерімді түсіндім. Осы жерде бұрынғы ұстазым А.Шевченконың сөзі есіме түсіп отыр, «біз ала алмаған асу, тек шыңдай түседі». Жеңімпаз атанған әншілерден жеңілу маған ұят емес, оның үстіне менің көзқарасым бойынша бас жүлдені армениялық әнші Русланның алғаны әлдеқайда әділдірек болар ма еді деген ой қалды. Барлық әншілер – мықты орындаушылар. Өз елінің үкі­ле­ген үміттері, мойындалған мық­ты­лары. Олармен кездесіп, әр ел­дің мә­дениетімен танысқаныма риза­мын. – Бос уақытыңды қалай өткізесің? –  Өзің ұнататын іспен айна­лыссаң, бос уақытың да осы іске арналады екен. Бос уақытымды пайдасыз өткізбеуге тырысамын. Өлең, ән жазамын. Музыкалық әдебиеттерді оқимын. Қазір айналысып жатқан істерімнің барлығы да болашақта қажетті, керек дүниелер. – Қасыңнан қандай жақсы қасиеті бар ерді көргің келеді? – Адал, сенімді әрі тәрбиелі. Өйткені, осы үш қасиет кез келген жанды сипаттап, бір-біріне тығыз байланысты деп ойлаймын. Әңгімелескен Венера ТҮГЕЛБАЙ, «Егемен Қазақстан».