Коллажды жасаған Қонысбай ШЕЖІМБАЙ, «EQ»
Біршама уақыт бұрын Ішкі істер министрлігі елімізде 245 көлік ұрланғанын мәлімдеген болатын. Бұл сандарға қарап отырып, еріксіз басыңды шайқайсың. Жыл ортасынан енді ғана асқанда 245 көлік ұрланса, жыл соңына дейін жағдай қалай болмақ?
«Осы жылы 245 көлік ұрлығы тіркеліп, оның 158-тің ізі суымай ашылды. Аталған қылмыстық істер сотқа жолданып, ұрланған көліктердің 54-і иелеріне қайтарылды. Ұрланған көліктерді көрші елдер арқылы Қазақстанға кіргізу фактілері де тіркелді. Мәселен, көршілес елдер арқылы ел аумағына кірген 32 көліктің ұрланғаны анықталып отыр», деген болатын Ішкі істер министрлігінің өкілі баспасөз қызметі мәселенің мәнісіне үңіліп.
Көлік ұрлығы деректері Жамбыл облысында да тыйылмай тұр. Бірер күн бұрын Тараз қаласындағы жедел басқару орталығына хабарласқан шаһар тұрғыны шағын аудандардың біріндегі тұрақтан «ВАЗ» маркалы автокөлігінің жоғалғанын айтып хабарласқан.
Аталған дерек бойынша жұдырықтай жұмылып жұмыс істеген полиция қызметкерлері күдікті ретінде 33 жастағы Байзақ ауданының тұрғынын ұстаған. Тергеп-тексеру барысында күдікті Ресей елінің тіркеуінде тұрған «ВАЗ» маркалы көліктерді түн қатып ұрлап, өзге өңірлердің тұрғындарына төмен бағамен сатып келгені белгілі болды. Деректерге сенсек, ол осы күнге дейін 13 автокөлік ұрлаған екен.
Тергеу барысында күдікті азамат өзінің кінәсін толығымен мойындады. Бүгінде ол уақытша ұстау изоляторына қамаққа алынған. Аталған дерек бойынша Қылмыстық кодекстің 200-бабы 1-тармағымен (Автомобильдi немесе өзге де көлiк құралын жымқыру мақсатынсыз құқыққа сыйымсыз иеленіп алу) сотқа дейінгі тергеу амалдары жүргізіліп жатыр.
Жамбыл облысы
