Түсі қара немесе сұр автокөліктер көбірек жол апатына ұшырайтын көрінеді

АСТАНА. 13 мамыр. Еліміздегі сақтандыру компанияларының бірі 2013 жылы жол апатына ұшыраған жеңіл автокөліктерге қатысты түрлі статистикалық мәліметтерге сүйене отырып, жол көлік оқиғасына мейілінше көбірек қандай түсті машиналар тап келетін зерттеді. Бұл туралы «24kz» хабарлады. Зерттеу нәтижесінде анықталғандай, ақ, сарғыш, сары, фиолет түсті автокөліктер келеңсіз жағдайға басқаларға қарағанда едәуір аз кезігетін көрінеді. Мамандардың пікірінше, ақ, сарғыш және фиолет түсті машиналар жолда анық көрінетіндіктен апатқа сирек түседі екен. Ал, жұртшылыққа көбірек ұнайтын қара және сұр түсті темір тұлпарлар жол апатына мейілінше жиі-жиі ұшырайтын болып шыққан.  Нақтылай айтқанда, сұр қара түсті әрбір бесінші автокөлік бір рет болса да жол көлік оқиғасына кезіккен. Мамандар мұны таң ата әрі кеш батқан кезде күміс және қара түсті автокөліктер жол үстінде көзге әрең ілігетінімен түсіндіріпті. Сол сияқты, қызыл автокөліктер де  қауіпті екен. Өйткені, қызыл көлікті әдетте жас жігіттер мен қыздар таңдайды. Ал, жол апатына тап келетіндердің көбісі осы топтағылар. Кейбір деректерге қарағанда, еліміз бойынша жол-көлік оқиғасына кінәлі 24 пен 33 жас аралығындағы ер азаматтар жалпы жол апатының  37 пайызын,  қыздар 38 пайызын құрайды. Мамандардың пайымдауынша, қара немесе қызыл түсті машинаны қалайтын жүргізушілер әдетте жүйіткіп жүргенді жақсы көреді. Әрі спорттық автокөліктердің көбі қара немесе қызыл түсті көрінеді. Реті келгенде айта кетейік, 2013 жылы еліміз бойынша 23 359 жол апаты тіркеліпті. Соның салдарынан 3 мыңнан аса адам қайьыс болып, 29 мың жан түрлі жарақат алған. Жолдыбай Базар. Дереккөз: «24kz». Фото: semey.tv.