Ал Қазақстан үшін екеуі де маңызды. Әсіресе, шалғай аймақтар үшін су, жол, газ, ғаламтор да күн тәртібінде тұр. Осы тұста бүгінгі Қ.Тоқаевтың Жолдауында да барлық бағыттағы инфрақұрылымды дамытуға назар аударылды. Атап айтсақ, геосаяси тұрақсыздық жағдайында Қазақстан өзінің көлік дәліздерін барынша дамытуы керек, әсіресе Каспий арқылы өтетін Транскаспий халықаралық көлік дәлізін дамытып, осы аймақта қазіргі заманға сай логистикалық хаб құру маңызды. Бұл қазіргі жағдайда осы бағытта еселеп артқан жүк көлемін игеруге ықпал етеді.
Жол салу – бұл шенеуніктердің «табыс көзіне» айналмауға тиіс, жол құрылысының сапасына бақылауды күшейту керек. «...автожол құрылысына, соның ішінде жергілікті жолдардың сапасына баса мән беру керек. Бюджеттен қыруар қаржы бөлінсе де, бұл мәселе әлі шешімін таппай отыр» деді Президент. Әлеуметтік инфрақұрылымның ішінде медициналық және білім беру мекемелерімен халықты жеткілікті қамтамасыз ету аймақтар, тіпті қалалар үшін де өзекті. Жолдауда айтылғандай «...650 елді мекенде емдеу мекемесі жоқ. Алдағы екі жылда бұл ауылдарда медициналық және фельдшерлік-акушерлік бөлімшелер салынып, қажетті құрал-жабдықпен толық қамтамасыз етіледі. Ұлттық жоба аясында 32 аудандық аурухана заманға сай жаңарып, енді ауданаралық көпбейінді мекемеге айналады. Онда инсульттен емдеу орталықтары, хирургия, жансақтау және оңалту бөлімдері ашылады».
Мектепке дейінгі және білім беру мекемелерінің жетіспеушілігі – бұл болашақ еңбекке қабілетті экономикалық белсенді халықтың сапасының төмен болуына тікелей әсер етеді. Жолдауда айтылған осы бағыттағы жұмыстарды да кейінге ысыруға болмайды.
Сонымен қатар Жолдауда қала, тұрғын үй инфрақұрылымын дамытуға да нақты ұсыныстар айтылған. Осы тұста халықтық экспертиза – әлеуметтік бақылауды күшейтуді ұсынамын. Себебі жыл сайын Жолдауда келелі ұсыныстар айтылады. Ал оның орындалу барысын жауапты тұлғаларды қызметтен босатумен ғана ақтау аздық етеді деп ойлаймын. Ғылыми қауымдастық, қоғамдық ұйымдар және халық болып Президенттен бастау алған идеялардың іске асырылуын қадағалауымыз қажет.
Айсұлу ТҰРСЫНБАЙҚЫЗЫ,
Экономика институты Заманауи зерттеулер бөлімінің меңгерушісі
