Астанада масадан келер қауіп жоқ

АСТАНА. 14 мамыр. Елордада улы масалар пайда болды деген хабар жай ғана қауесет болып шықты. Бұл туралы «24kz» хабарлады. Астана қалалық тұтынушылар құқықтарын қорғау департаменті бөлімі басшысының міндетін атқарушы Нағима Шатаева улы масаларға қатысты ақпараттың негізсіз екенін алға тартып отыр. Ол: «Улы масалар таратуы мүмкін деген безгек ауруы субтропикалық сипатқа ие. Қазақстан субтропикалық аймақта орналаспаған. Оның үстіне елімізде безгекпен ауырған адамдар тіркелген жоқ. Сол себепті тұрғындардың алаңдауы негізсіз», – деді. Биыл қаланы дәрілеу ісіне бюджеттен 129 млн. теңге қаралған. Дезинфекциялық жұмыстарды «Астана-Зеленстрой» коммуналдық кәсіпорны атқаруда. Айына бір мәрте жүргізілетін залалсыздандыру шарасына 60-қа жуық маман қатысуда. Бұлар Есіл жағасы мен саябақтарға көбірек көңіл бөліп отыр. Қаланы дәрілеу қыркүйекке дейін жалғаспақ. Аталған департменттің бас маманы Айбарша Дүйсенбайқызының айтуынша, қалада инфекция көзі жоқ. Ал дезинфекциялық шараларды жүргізудегі мақсат – безгек ауруларының алдын алу. Жолдыбай Базар. Дереккөз: «24kz». Фото: elementy.ru.