Бұл мектеп құрылысы былтыр басталып, жаңа оқу жылына дейін оқушыларды қабылдауға дайын болды. Ауданға сапармен келген облыс әкімі Нұрлыбек Нәлібаев осы №71 орта мектепке барып, жаңа білім ошағының табалдырығын аттаған ұстаздар мен оқушыларға тілегін жеткізді.
Биыл облыстағы апатты деп танылған 4 мектептің үшеуінің орнына жаңа ғимарат салынып жатыр. Мысалы, осы аудандағы Тоқабай елді мекенінде №248 орта мектеп жеке инвестор есебінен қайта бой көтеруде. Бұл ауыл мектебін биыл бітірген оқушыларының барлығы мемлекеттік грант иегері атанып отыр.
Алдағы 3 жылда осы Арал ауданының өзінде 8 мектеп салынбақ. Олардың қатарында кезінде асар әдісімен қолда бар материалдармен соғылған Сапақ ауылдық округіндегі №69 орта мектеп пен Мергенсай елді мекеніндегі №58 орта мектеп келер жылы салынады. Жалпы, облыста алдағы 3 жылда 32 білім ошағы бой көтереді.
Аудандағы әлеуметтік нысандар қатарына Жақсықылыш кентінде ашылған «Асылым» атты жеке балабақша қосылды. Балабақша 140 балаға лайықталған. Облыс әкімі ауыл тұрғындарын жаңа нысанның ашылуымен құттықтап, білімге инвестиция құйған кәсіпкерге алғыс білдірді. Жалпы, Арал 3 пен 6 жас аралығындағы балдырғандарды балабақшамен 100 пайыз қамтыған аудан атанып отыр. Алдағы уақытта ауданда 16 жеке балабақша және мектеп жанынан 4 шағын орталық ашылмақ.
Сапар барысында Нұрлыбек Нәлібаев Аралқұм ауылдық округіне қарасты Шөміш елді мекеніндегі «Латон-Маркет» ЖШС демеушілігімен салынған әмбебап кіші спорт алаңын көріп, ауыл тұрғындарымен кездесті.
– Балаларға тарту ретінде өңірде парктер, скверлер салынуда. Жақында ғана Жаңақорғанда меценат 750 млн теңгеге парк салуды бастап кетті. Одан бөлек облыс орталығы мен аудандарда демеушілер қолдауымен 80 балалар алаңы бой көтереді. «Анаға тағзым» атты алаң салуға 1,5 млрд теңге жұмсауға бел байлаған азаматқа да алғыс айтамыз. Балалар жылында осындай кәсіпкерлер балдырғандарға осындай тарту жасап отыр, – деді Н.Нәлібаев.
Аудандағы жылына 120 мың тонна кварц құмын өндіретін Aral Quarts тау-кен комбинаты алғашқы кезеңде 40 адамды жұмыспен қамтыса, 172 мың тонна құрғақ құрылыс ұнтағын шығаруға көшкеннен бастап еңбекке тартылған мамандар қатары артты. Өндіріс орны ішкі нарықты 80 пайыз өніммен қамтиды. Облыс басшысы болашақта облыс орталығында іске қосылатын шыны зауытына дем беруге мүмкіндігі жететін кәсіпорын жұмысын тиімді үйлестіруді тапсырды.
Аманөткел ауылдық округіндегі дене шынықтыру және сауықтыру кешені «Ауыл – ел бесігі» бағдарламасы аясында ашылып отыр. Жаңа кешенде облыс әкімі жастармен жүздесіп, пікірлесті. Мұнда бір мезетте 40 бала баскетбол, волейбол, шағын футбол ойнай алады. Ауданда мұндай денешынықтыру-сауықтыру кешені Жақсықылыш кенті мен Қамыстыбас елді мекенінде де салынып жатыр.
Қызылорда облысы
