Кездесуге Қазақстан Жазушылар одағы басқарма төрағасы, Мемлекеттік сыйлықтың лауреаты Ұлықбек Есдәулет, облыс әкімінің орынбасары Еркін Үйсімбаев, қаламгерлер Жұмабай Шаштайұлы, Жүсіпбек Қорғасбек, Қасымхан Бегманов, Маралтай Райымбекұлы бастаған өзге де азаматтар қатысты. Дөңгелек үстел отырысын республикалық жалпыұлттық «Egemen Qazaqstan» газетінің әдебиет және өнер бөлімінің меңгерушісі, ақын Ерлан Жүніс жүргізіп отырды.
Басқосуға қатысқан қаламгерлер қауымы «Қордайдың қоңыр құлжасы» тақырыбымен өткен жиында жазушы туралы естеліктерімен бөлісіп, ұсыныстарын айтты. Олар Несіпбек Дәутайұлы өмірінің соңына дейін «Жамбыл» республикалық әдеби журналын шығарып отырған, «Айғыркісі», «Құдірет пен қасірет», «Батыр», «Кісі иесі», «Шал» секілді өзге де ғажап туындыларын жазған кабинетті қаламгердің музей-үйі ретінде сақтауды сұрады. Сондай-ақ «Жамбыл» республикалық әдеби журналын әрмен қарай шығару қажеттігін атап өтті. Сонымен қатар қаламгерлер Тараз төрінде жазушының орындықта отырған бейнесі орнатылса деген тілектерін де жеткізді. Жоғарыда қаламгерге Шерағаның «Қордайдың қоңыр құлжасы» деп ат қойғанын айттық. Биыл Шерағаның 90 жылдығына орай Тараздағы «Жамбыл» даңғылының бойында Шерхан Мұртазаның ескерткіші бой көтереді. Ал жыл соңында қаламгердің 75 жылдығы өтуі керек. Шығармашыл тұлғаның бейнесі Шераға ескерткішінің қасында тұрса еш артық болмас еді. Біріншіден, Шерхан Мұртаза Нескеңді қаламгер інісі ретінде құрметтеді. Екіншіден, «Жамбыл» журналын шығарған қаламгердің ақын атындағы көшеде, Шерағаның қасында тұрғаны нағыз архитектуралық ансамбль әрі ұтымды шешім болар еді.
Дөңгелек үстел отырысы барысында қаламгерлер қазақтың қабырғалы жазушысының есімін құрметтеу үшін көптеген ұсыныс айтты. Әсіресе Жүсіпбек Қорғасбектің ұсынысы көңілге қонды деуге әбден болады. Ол Несіпбек Дәутайұлы тудырған «Айғыркісі» образын әспеттеу үшін сол бейне тұғырға қонып, бой көтерсе деген ниетін жеткізді. Қордай ауданының әкімі Мәден Мұсаев аталған ұсынысты қабыл алып, қаламгер туған өлкеде жүзеге асырса ешкім ұтылмас еді.
Қазақстанның еңбек сіңірген қайраткері, Халықаралық «Алаш» әдеби сыйлығының лауреаты Несіпбек Дәутайұлының жылдық асына орайластырылып өткізілген іс-шара барысында қаламгердің іздеушісі, інісі, еліміздің Ақпарат және қоғамдық даму министрі Дархан Қыдырәлінің қолдауымен жарық көрген «Қордайдың қоңыр құлжасы» атты естеліктер топтастырылған жинақтың тұсауы кесіліп, жиынға келген жұртшылыққа түгелдей таратылды.
Кездесулер өтеді, ұсыныстар айтылады. Алайда көп жағдайда айтылған әңгіме сөз күйінде қалып жатады. Жергілікті атқарушы биліктің өкілдері бұл жолы басқосуда көтерілген ұтымды ұсыныстарды қаперге алып, қорытынды шығарар ма екен? Кім білсін... Бәріне уақыт төреші. Бір анығы, желтоқсан айында қаламгердің 75 жылдық мерейтойына орай бірқатар іс-шара өткізілетін секілді.
Жамбыл облысы,
Қордай ауданы
