Кездесу барысында ауыл тұрғындары мен шаруа қожалықтарының басшылары жердің құнарсыздануы, құдық тапшылығы, субсидияның төмен деңгейі, дизель отыны бағасының қымбаттауы секілді мәселелерді көтерді.
Amanat-тың Атқарушы хатшысы құрамына партияның депутаттары, Бас прокуратураның, Ауыл шаруашылығы министрлігінің өкілдері, заңгерлер, қоғам қайраткерлері кіретін комиссия мүшелері ауыл тұрғындарының мәселелерін білу үшін еліміздің барлық өңірінде кездесулер өткізіп жатқанын атап өтті.
«Мемлекет басшысы Қасым-Жомарт Тоқаевтың тапсырмасы бойынша, пайдаланылмай жатқан және жеке меншікке заңсыз берілген ауыл шаруашылығы жерлерін мемлекет меншігіне қайтару жөнінде жұмыс жүргізілуде. «Жер аманаты» комиссиясының міндеті – ауыл тұрғындары үшін жайылымға тең қолжетімділікті қамтамасыз ету. Үш айдың ішінде партияның араласуымен 10 өңірде 1,6 млн гектардан астам жер қайтарылды. Оның ішінде Қарағанды облысында 1 млн гектар жайылым мемлекет меншігіне өтті. Біз бұл істі тоқтатпаймыз. Осы бағыттағы тұрақты жұмысты жалғастырамыз», деді Асхат Оралов.
Жайылым тапшылығы жер саласындағы жалғыз мәселе емес екенін атап өткен Мәжілістегі Amanat фракциясының мүшесі Ерлан Саиров кездесулердің қорытындысы бойынша заңнамаға тиісті өзгерістер енгізілетінін айтты.
Жергілікті тұрғын Нұрбол Арынбаевтың айтуынша, ауыл тұрғындары «Жер аманаты» комиссиясына үлкен үміт артады. «Мал саны өсіп жатыр. Ал жем-шөп базасы жетіспейді. Әсіресе шағын шаруашылықтарға қиын. Жаңа жайылымдар, мемлекет тарапынан қолжетімді субсидиялар қажет», деп атап өтті ол.
Аудан тұрғындарының басым бөлігі ет және сүт шаруашылығымен айналысатынын алға тартқан шаруа Елдос Майлыбаев: «Жайылым тапшылығы әр ауылда сезіледі. Комиссия жұмысының осы облыстағы нақты нәтижесін көріп отырмыз. Бұл – қуанарлық жағдай. Партиялықтармен кездесуде өзге де түйткілді мәселелерді атап өттік. Ол мәселелер де өз шешімін табуы тиіс», деді.
Белгілі заңгер Бақытжан Базарбек комиссия мүшелері жайылымдардың әділ бөлінуіне қол жеткізуді жалғастыратынын атап өтті. «Өкінішке қарай, жергілікті тұрғындар барлық жайылымнан шеттетілді. Ауыл тұрғындары мұндай комиссияны күтіп отырғанын көріп отырмыз. Бәрін тексеріп, қазірде кейбір олигархтардың жерін мемлекетке қайтарып жатырмыз. Тағы да қайталап айтамын: заң алдында бәрі тең», деді ол.
Сондай-ақ кездесулер аясында партияның Қарағанды облыстық филиалында «Жер аманаты» комиссиясының мүшелері азаматтарды қабылдады.
Айта кету керек, партияның жер мәселелерін неғұрлым жедел шешу үшін ашылған «Жедел желі» телефонына 1,5 мыңнан астам өтініш келіп түскен. Оның барлығы өңірлік комиссиялардың қарауына берілді.
