Форумға Экология, геология және табиғи ресурстар министрлігінің Қалдықтарды басқарудағы мемлекеттік саясат департаментінің, Атырау облысы бойынша экология департаментінің және Атырау облысының табиғи ресурстар және табиғат пайдалануды реттеу басқармасының, «Green economy» «Еуропа-Азиялық қауымдастығы» ЗТБ, KazWaste қазақстандық қалдықтарды басқару қауымдастығының өкілдері, шетелдік компаниялар, сондай-ақ өндіріс және тұтыну қалдықтарын кәдеге жарату жөніндегі қызметтерді көрсететін мамандандырылған кәсіпорындардың меншік иелері мен басшылары қатысты.
Форум барысында ведомство мамандары өндіріс және тұтыну қалдықтарымен жұмыс істеу саласында қызмет көрсететін кәсіпорындарға қатысты қолданылатын экологиялық заңнаманың талаптары туралы ақпаратпен бөлісті. Ал ТШО мамандары компанияның әлеуетті бизнес-серіктестерге қоятын ішкі талаптары туралы айтты. Қауымдастық өкілдері қалдықтардың жекелеген түрлері бойынша ұлттық стандарттардың талаптарын түсіндірді. Шетелдік компания өкілдері өндіріс және тұтыну қалдықтарын басқарудағы халықаралық тәжірибелерімен бөлісті.
Атырау облысы экология департаментінің басшысы Әлібек Бекмұхаметов форумға қатысушыларды қауіпсіздікке баса назар аударуға және қолжетімді озық технологияларды белсенді енгізуге шақырды. «Біз Қазақстанның түкпір-түкпірінен өңдеуші компаниялар туралы ақпарат алдық. Сонымен қатар қазақстандық компаниялардың мүмкіндіктерін зерттейтін боламыз. Қажет болса, заң талабы бойынша тексеру жүргіземіз. ТШО қазірдің өзінде қалдықтарды өңдеумен айналысады, бірақ мұнымен тоқтап қалмай, үздік технологияларды енгізуді көздеп отыр. Осы тұрғыдан алғанда бұл форумның пайдасы зор», деді ол.
«Қалдықтарды басқару Қазақстан Республикасының «Жасыл экономикаға» көшуі жөніндегі тұжырымдамасының маңызды құрамдас бөлігі болып саналады. Өздеріңіз білетіндей, «Теңізшевройл» ЖШС экологиялық көрсеткіштерді үнемі жақсартуға ұмтылады. Сіздер бізді ұдайы бақылап, басты құндылықтарымызбен санасып, қашанда пікірлесіп тұрасыздар. Бұл – біз үшін үлкен мәртебе. Бірлескен талап арқылы ғана біз жергілікті халықты жұмыспен қамтамасыз ете отырып, экономикалық белсенділікті арттырып, жоғары сапа стандарттарын енгізіп, қалдықтарды барынша өңдеуге және қайта пайдалануға қол жеткізе аламыз», деді ТШО бас директорының орынбасары Көңілқош Сүйесінов.
Атырау қаласынан оңтүстік-шығысқа қарай 160 шақырым жерде орналасқан Теңіз кен орнында Қазақстанның әр өңірінен келген мыңдаған жұмысшы тұратын жүзге жуық вахталық қалашықтар мен өндірістік кешен орналасқан. Компанияның өндірістік қызметінің және ілеспе инфрақұрылымның нәтижесінде әртүрлі қалдықтардың 63 түрі жиналады және оның 35-тен астамын компания дербес немесе бөгде ұйымдарды тарта отырып, табысты қайта өңдеуге қабілетті. 2015 жылдан бастап 2022 жылға дейінгі кезеңде бөгде ұйымдардың қайта өңдеуі үшін қалдықтарды беру көлемі 700 мың тоннадан асты. Соның ішінде қалдықтарды қайта өңдеуге көп көңіл бөлінеді. Мысалы, 2016-2022 жылдар аралығында 2 259 тонна пластикалық бөтелкелер қайта өңдеуге жіберілді. Оның ішінде пластикалық және ПЭТ түйіршіктері бар басқа да тауарлар шығарылды. 5 861 тонна қағаз бен картон буып-түю материалдары мен басқа да тауарлар өндіріске жіберілді. Ал 99 542 тонна бетон қалдықтары құрылыс материалы ретінде пайдаланылды және «үшінші тұлғаларға» берілді.
Барлық өндірістік алаңдар, вахталық кенттер мен ТШО-ның басқа да нысандарында қалдықтарды санаттар бойынша бөлу үшін түрлі-түсті таңбаланған арнайы контейнерлер орнатылған: пластикалық бөтелкелер, картон, кеңсе қағазы, шыны, бейкондициялық металл және т.б.
Шығарылған барлық қалдықты Теңіз кен орнының өндірістік және әкімшілік учаскелерінен өндіріс және тұтыну қалдықтарын басқару жөніндегі компанияның «хабы» болып саналатын «Тенгиз Эко Центр» нысанына тасымалдайды. 100 га аумақта қалдықтарды қауіпсіз қабылдайтын, тарататын, уақытша сақтайтын және кәдеге жарататын заманауи көпфункционалды қалдықтарды басқару нысаны 2004 жылы пайдалануға берілді. Аталған нысанда Tana ағаш қалдықтарын ұсақтағыш, Parker тас ұнтақтағыштары, BOMAG және Caterpillar қалдық тығыздағыштары, Newster медициналық қалдықтарды кәдеге жаратушы, WHS жартылай автоматты сығымдау қондырғылары және Itimuse қағаз ұсатқышы сияқты танымал өндірушілердің бірегей жабдықтары жұмыс істейді.
Қайта өңдеу көлемдерін одан әрі кеңейту мақсатында ТШО өнім берушілер нарығына үнемі мониторинг жүргізеді және қалдықтармен жұмыс істеудің қолжетімді әдістерін зерделейді. Компанияның бұл ынтасы ел Үкіметі белгілеген жасыл қағидаттарды қолдауға, сол арқылы нормативтік талаптар мен халықаралық стандарттардың сақталуын қамтамасыз ете отырып, қалдықтарды басқаруда одан да маңызды көрсеткіштерге қол жеткізуге және елеулі үлес қосуға мүмкіндік береді. Айта кетерлігі, бұл ауқымды жобаға қатысушылардың біліктілігі мен жоғыры құзыреттілікке ие болуы өте маңызды.
