«Дос-Мұқасан» туралы фильм

Ефрат Шәріповтің сценарийі бо­йынша Aray Media Group студиясы түсірген фильм­нің продюсері – Айгүл Байбек, ал музы­калық драманың ре­жиссері – Айдын Саха­ман. Киножоба Мәдениет және спорт ми­нистр­лігі мен Ұлттық кинематографияны қол­дау мем­­лекеттік орталығының қолдауымен түсірілген.

Фильмнің бас продюсері Айгүл Байбектің айтуынша, «Дос-Мұқасан» вокалды-аспаптық ансамблі – біздің мақтанышымыз. «Олар жайлы фильм түсіру – біз үшін үлкен мәртебе. Бұл менің бас продюсер ретіндегі ал­ғашқы то­лықметрлі көркем фильмім. Кәсіби музы­кант ретінде мен үшін аты аңызға айнал­ған ансамбльдің негізін қалаушылармен бірге құрылу тарихын зерттеп, жеке араласу, өнер­дің ең нәзік бағыты – музыка жайлы фильм тү­сіру қызық болды. Біз фильм сюжетіне өзек бол­ған «Дос-Мұқасанның» шынайы тарихын жет­кізуге, сол кездегі музыкалық рухтың ерек­ше атмосферасын жасауға тырыстық», дейді ол.

Фильм режиссері Айдын Сахаман фильмге тартылған актерлердің кә­сі­билігі, музыкалық алғырлығы, ха­ризмасының маңызы туралы айтты. «Жас әртістеріміздің шеберлігі барлық жас санаты үшін қызықты картина жасауға жол ашты. Аға буын жастық атмосферасын сезінуді, ал жас ұрпақ үшін вокалды-аспаптық ансамбльдің тарихымен танысуға мүмкіндік алды», деді А.Сахаман.

Байопикті сенімді түрде бейімдеу және оған қазақ рокының негізін қа­лаушылардың қайталанбас тартым­ды­лығын беру үшін бас кеңесші ретінде вокалды-аспаптық ансамбльдің негі­зін салушылар Мұрат Құсайынов пен Досым Сүлеев шақырылған.

Фильмнің актерлік құрамы портреттік ұқсастық бойынша таңдалған. Басты рөлдерді актер Мейірғат Амангелдин, Мақсат Сәбитов, Ел­дос Шайкенов, Саят Мақұлбаев, Айғаным Сағынбаева, Никита Погодаев, Нұрғиса Қуаныш­байұлы және Әбілмансұр Серіков ойнады. Танымал блогерлер мен вайнерлер Артур Асқарұлы мен Зухра Сайпи де фильмде дебют жасады.

«Авторлар, ең бастысы, біздің му­зыкаға деген сүйіспеншілігімізді, көңіл күйімізді, сол кездегі атмосфераны жеткізе алды. Ұзақ жыл­дар бойы кадр сыртында, сахна артында қал­ғаны – жолымыздағы қиындықтар мен интри­га­лар, кеңестік идеологияға қайшы келетін өз стилімізді сақтаудағы қиындықтар, ұжым ішін­дегі қарым-қатынастар мен реніштер то­лы­ғымен дерлік бұрмаланбай көрсетілді», дейді ансамбльдің негізін қалаушы Досым Сүлеев.