Ресми мәліметтер бойынша Джорджи Мелонидің «Ағайынды Италия» партиясы 26 пайыздан астам дауыс жинаса, Маттео Сальвинидің Лигасы (немесе Солтүстік Лигасы) 8,78 пайыз дауысқа ие болды, Сильвио Берлусконидің «Алға, Италия!» партиясы оңшыл коалицияға тағы 8,12 пайыз дауыс қосты. Exit poll қорытындысы бойынша 26,14 пайыз ұпаймен солшыл орталық партиялар екінші орынға жайғасқан.
Джорджи Мелонидің сайлауалды науқаны «Италияны әйел басқаратын кез келді» ұранымен өткен. Ол Италия Республикасының үкіметін басқарған тарихтағы алғашқы әйел болмақ. Оның бағдарламасы «Құдай, Отбасы, Отан» триадасына арналған. Ал бұл «дәстүрлі патриархалдық қоғамның құндылықтарымен сәйкес келеді», дейді сарапшылар. Мелонидің бағдарламасында әйелдердің еңбек нарығына қатысуын арттыруға бағытталған нақты шаралар туралы тікелей нұсқау жоқ. Алайда сарапшы мамандар нәзік жандарды қолдаудың, ерлер мен әйелдердің жалақысындағы теңсіздікті жоюдың жалпы белгілері бар екенін айтады.
Сайлау қорытындысы бойынша билікке бірінші оңшыл коалициялық үкімет келуі керек. Алайда оның пайдасына шешілген дауыс беру нәтижелері бойынша коалициядағы ережелерді Джорджи Мелони айқындайтын болады. «Ағайындылар» партиясының басшысы өзі басқаратын Италияның жаңа үкіметінің бүгінгі итальян қоғамын екіге бөліп тұрған негізгі мәселелерге қатысты ұстанымы қандай болмақ?
Қазіргі кезде Италияда заңсыз иммиграциямен күрес мәселесі өзекті болып тұр. Заңсыз иммиграция азаматтардың қауіпсіздігі мен өмір сүру сапасына қауіп төндірері сөзсіз. Ал Мелони болса халықаралық қауымдастық тарапынан айтылатын сыни пікірлердің алдын алу үшін сайлау науқаны кезінде ол туралы көп айтпауға тырысты. Ол теңіз блокадасын орнату қажеттігін ғана алға тартты. Бұл тұрғыда сарапшылар Мелониді «заңсыз иммиграциямен күресте жұмыс істемейтін тұлға» ретінде танып отыр.
Десе де, орталық оңшылдар елде біркелкі мөлшерлемеге негізделген пропорционалды салық жүйесін енгіземіз деп уәде беріп отыр. Оны негізі 1994 жылы Сильвио Берлускони профессор Антонио Мартиномен бірге енгізбек болған. Қазірде жаңа үкімет жеке тұлғалар мен кәсіпорындарға 23 пайыздық бірыңғай мөлшерлеме енгізуді ұсынып отыр. Оған сәйкес жылдық табысы 65 мың еуродан төмен екі миллионға жуық салық төлеуші 15 пайыз мөлшерінде бір реттік салық төлей отырып, біркелкі мөлшерлеме режімін пайдаланады.
Ал Еуропалық одақтағы Италияның ендігі ұстанымы қандай болмақ? Негізі Джорджи Мелони мен Маттео Сальвини Еуроодаққа қарағанда ұлттық басымдықты жақтайтындардың қатарында. Берлускони болса Орталық оңшыл коалиция құрылғаннан бері одақтастары мен Еуроодақ арасындағы көпір ретінде жүрді. Дегенмен шындығында Мелони бастаған үкіметтің Еуропада өзін қалай ұстайтыны әлі белгісіз.
Сарапшылар Мелонидің Украинадағы қақтығыс туралы пікірі қандай екеніне де назар аударды. Олардың айтуынша, осы жылдар ішінде Джорджи Мелони Владимир Путин туралы оң көзқараста болып, оған өз елінің мүддесін табандылықпен қорғағаны үшін құрмет көрсетіп келген. Бірақ 24 ақпаннан кейін ол Украинаға әскери және экономикалық қолдау көрсетуге атсалысып, үнемі қолдап келеді. Осылайша, Киевке әскери және экономикалық көмек көрсетіп, сондай-ақ Еуроодақтың Ресейге қарсы санкцияларын қолдау жақын болашақта жалғасын таппақ.
Жаңа шақырылымдағы парламенттің бірінші сессиясы 13 қазанға белгіленген. Екі палатаның спикерлері сайланады деп жоспарланып отыр. Басқару иерархиясының екінші және үшінші орындарын кім алатыны анықталғаннан кейін мемлекет басшысымен консультациялар басталады. Олар 17-18 қазанға жоспарланады, деп хабарлайды Sky TG24 арнасы. Сарапшылардың айтуынша, жаңа билік ЕО белгілеген мерзімнен кейін бюджетті дереу бекітуі керек. Бұл жерде, Драги жақтаушылары Марио Драгидің бұрынғы үкіметінің жобасын негізге алуға болатынын алға тартады.
Саны үштен біріне қысқартылған болашақ парламенттің түпкілікті құрамы біршама күрделі пропорционалды-мажоритарлық жүйе бойынша белгіленеді, бірақ бір мандатты алып тастауға байланысты бірқатар белгілі саясаткерлердің тағдыры күмән тудыруда. Мәселен, соңғы үкіметтің Сыртқы істер министрі Луиджи Ди Майо жаңа шақырылымдағы парламентке кірмейді.
Джорджи Мелони 13 қазаннан кейін ел президенті Серджо Маттарелладан жаңа үкімет құру мандатын алады деп күтілуде, осылайша ол келесі айдың соңына таман қызметіне кіріспек.
Италияның бұрынғы премьер-министрі Марио Драги үкімет басында отырғанда 2021 жылы Қазақстан мен Италия арасындағы тауар айналымы 10 млрд долларға жуықтаған. Соның 8,4 миллиард доллары біздің экспорт болса, 1,6 миллиарды импорттық тауарлар.
Қазақстанның сыртқы тауар айналымы бойынша үшінші орында тұрған мемлекет те – пицца мен пастаның отаны Италия. Қазақстан Апеннин түбегіне негізінен шикі мұнай, газ конденсаттарын, мұнай өнімдерін, мазут, мыс, алтын, мырыш секілді шикізат жібереді. Ал Италиядан көлік, құрал-жабдық және шарап алады екенбіз. Жалпы, Италия – Қазақстанның негізгі инвесторларының бірі. Мәселен, тәуелсіздіктің 30 жылында Италия елімізге 6,7 миллиард доллар қаржы құйған екен.
Айтпақшы, тағы бір дерек. Италия мен Қазақстан арасындағы дипломатиялық қатынас тамыз айында орнаған. Бұдан бөлек, мемлекет басшылары да бірнеше рет өзара ресми және жұмыс сапарымен барып қайтқан. Қысқасы, екі ел арасындағы байланыс жоғары деңгейде деп айтсақ қателеспейміз.
