Шәкәрім университеті Абай облысының іргелі жоғары оқу орны және ірі әлеуметтік институт ретінде қоғам алдында аса жауапты рөл атқарады. Оқу ордасы дарынды жастардың өңірде білім алуына, қолдау көрсетуге әрдайым ерекше мән береді. Университет жыл сайын «Алтын белгі» иегерлеріне, пәндік олимпиада мен ғылыми конкурс жеңімпаздарына «Шәкәрім грантын» тағайындап келеді. Осы орайда Президенттің облыстағы жоғары оқу орындарына қосымша 500 грант бөлу тапсырмасы өңір жастарына үлкен қолдау деп есептеймін.
Мемлекет басшысы өңірге сапары кезінде Семейдегі университеттердің жанынан IT саласы мен тілдерді тереңдетіп оқытатын мектептер ашу қажет екендігін баса айтты. Аталған тапсырманы орындауға Шәкәрім университеті
әзір.
Күні кеше университет жанынан Shakarim high school жұмысын жүргізуге лицензия алынғанын қуана хабарлаймыз. Сондай-ақ таяу күндері Мемлекет басшысының тапсырмасында белгіленген салалар бойынша оқушылар қабылдауды бастаймыз.
Тағы бір екпін түсірілген мәселе – тұлға тәрбиесі. Осы бағытта Президент хакім Абайдың «Толық адам» тұжырымдамасына сүйене отырып, қоғамда жаңа құндылықтар орнықтыру қажеттігін баса айтты.
Шәкәрім шаңырағының да бүгінгі миссиясы – ұлттық құндылықтарды бойына сіңірген білікті маман дайындап, кемел тұлға, яғни Абай айтқан толық адамды қалыптастыру. Өйткені ұлттық құндылықтарын бойына сіңірген әр тұлға, ертең мектеп немесе университет бітіргеннен кейін шетел асып кетсе де туған еліне, жеріне қызмет етіп, елге қайтып оралады.
Демек, Президент атаған жобалар Шәкәрім университетінің аяқ алысымен дөп келіп, даму қарқынын еселете түсуде.
Бауыржан ЕРДЕМБЕКОВ,
Шәкәрім университетінің ректоры
Абай облысы